އައްޑޫ ސިޓީ އިން ފުރައިގެން މާލެއަށް ދަތުރުކުރަމުން ދިޔަ ބޯޓުން ގެއްލުނު މީހާ ހޯދުމުގެ މަސައްކަތް މެދުކަނޑާލައިފި އެވެ.
ސީމެކްސް ނަމަކަށް ކިޔާ ބޯޓުން ގެއްލިގެން ހޯދަމުން ދަނީ އެ ބޯޓުގައި ފަޅުވެރިޔެއްގެ ގޮތުގައި މަސައްކަތް ކުރަމުން ދިޔަ ނޭޕާލަށް ނިސްބަތްވާ ރާޖު ކުމާރު ކިޔާ މީހެކެވެ.
ރާޖު ގެއްލިގެން އެމްއެންޑީއެފްއަށް ރިޕޯޓް ކޮށްފައިވަނީ މިދިޔަ ހޯމަ ދުވަހުގެ ރޭގެ ވަގުތެއްގައެވެ.
ސީމެކްސް ބޯޓު އައްޑޫ އިން ފުރީ ހޯމަ ދުވަހުގެ ރޭ 11:30 ހާއިރު އެވެ. ބޯޓުގައި ރާޖު ނެތްކަން އެނގިގެން ރިޕޯޓް ކުރި އެ ބޯޓު އޮތީ ފުވައްމުލަކާ 8 މޭލު ދުރުގައެވެ.
އެމްއެންޑީއެފް އިން ބުނީ ރާޖު ގެއްލިގެން ރިޕޯޓް ކުރުމާ އެކު އޭނާ ހޯދުމުގެ މަސައްކަތް ފެށި ކަމަށެވެ. އަދި ކަނޑު މަގުން އެކަނި ކުރި މަސައްކަތް މެދުކަނޑާލުމާ ހަމައަށް 304 ނޯޓިކަލް މޭލުގެ ސަރަހައްދެއް ބަލާފައިވާ ކަމަށްވެސް ބުންޏެވެ.
މި އޮޕަރޭޝަންގައި ޑްރޯން ބޭނުން ނުކުރި ވަކި ސަބަބެއް އެމްއެންޑީއެފް އަކުން ނުބުނެ އެވެ.
ފުލުހުން ބުނީ ސީމެކްސް ބޯޓު އައްޑޫ އިން ފުރިއިރު ބޯޓުގައި ރާޖު ހުރި ކަމަށް ކެޕްޓަން މައުލޫމާތު ދީފައިވާ ކަމަށެވެ.