(27 މާރިޗު 2025 އާ ގުޅޭ)
"ހެ ހެ ހެ... ވާކިފްގެ އަނތްބަކު އަދިވެސް އެބަހުރިތަ؟." ސަމާސާގެ ހިނިގަނޑެއް ޖަހާލާފައި އޭނާ ބުންޏެވެ.
ޒަރަކް ގުޅައިގެން ހުރީ އޭނާގެ އެއްބަނޑު އެއްބަފާ ބޭބެ، ޒިދާންއަށެވެ. ވިޔަފާރީގެ ދުނިޔޭގައި އުހުގައި ވިދަމުން އަންނަ ވިޔަފާރިވެރިއަކަށް ޒިދާންވާނެ އެވެ. އޭނާއަށް ރާއްޖޭގެ ޒުވާން ވިޔަފާރިވެރީންގެ ތެރެއިން ނޭނގޭ މީހަކު ހުންނާނެހެން ހިޔެއްނުވެ އެވެ. ޒިދާންގެ މިޒާދުގައި ވެސް މީހުންނާ ގުޅޭ ފަދަ ސިފަތަކެއް ލިބިފައިވެ އެވެ. އޭނާއަށް އެހާ ފަސޭހައިން ޒަރަކްއަށް ޖަވާބުދޭން އެނގުނީ ވާކިފްއަކީ ޚުދު އޭނާއަށް ވެސް ފާހަގަކޮށްލެވިފައިވާ ޒުވާނެއްވީމަ އެވެ.
"ކީއްވެ ދޮންބެ ތިހެން ތިބުނީ. ވާކިފްގެ އަނތްބަކު ނުހުރޭތަ؟." ޒަރަކްއަށް އަހާލެވުނީ ހައިރާންވެފައި ހުރެ އެވެ.
"މީހެއްގެ ފިރިއެއްހެން އޭނާގެ އުޅުމުން ހީނުވަނީ. އޭނާގެ އުޅުން ހުރީ އެހާ ވެސް މިނިވަންކޮށް. ލިސްޓުގެ ދިގުމިން ނުބެލިއްޔާ ރަނގަޅުވާނީ. ނާޒުކު ހިތްތައް ޒަޚަމް ކުރަމުންދިޔަސް ޖިންސުއްލަތީފުންގެ ސަފަށް ބަދަލެއް އަންނަތަނެއް ނުފެނޭ. ވިޔަފާރިން އެކަންޏެއްނޫން އޭނާ ކުރީގައި އުޅެނީ. އެހެންވީމަ ބުނެވޭނެތާ އެކަހަލަ އެއްޗެހި. ދުވަހުވެސް އިވެންޓެއްގައި އަހަރެން ނުދެކެން އޭނާއާއެކު އެއް މޫނެއް ދެފަހަރަކު އައިތަނެއް. އޭނާ ކަހަލަ މީހަކު އަނތްބަކު ހޯދަފާނެތަ. އެވާނީ ބޮޑު ޖޯކަކަށް." ޒިދާންއަށް ވާކިފްއާ ބެހޭ ގޮތުން ސީރިއަސްކަމާއެކު ވާހަކައެއް ނުދެއްކުނެވެ. އޭނާއަށް ވާކިފްގެ މިޒާޖާއި އުޅުން ހުރި ގޮތް ފެނިފައި ހުރީމަ އެވެ. އިވުނު ވާހަކައިން ޒަރަކްގެ ބަސް ހުއްޓުނެވެ. އޭނާއަށް ހަރަކާތެއް ކުރާން ވެސް ނޭނގިފައި ހުއްޓާ ދެ ފަހަރަކު ޒިދާން ގޮވާލުމުން ޖަވާބެއް ދިނެވެ.
"ދާންޖެހިއްޖެ. އަހަރެން ފަހުން ދޮންބެއަށް ގުޅާލާނަން އިނގޭ." ޒަރަކް މިހެންބުނެ ފޯނުކޯލު ކަނޑާލި އެވެ.
ޒަރަކްގެ ދެ ދަތްޕިލާ ޖެހި ބާރުކޮށްލެވުނު ވަރުން ކޯކަށިގަނޑަށް ވާންވެލާފައި ހުއްޓެވެ. ދެ ބުމަ ކައިރިކޮށްލެވުނުއިރު އޭނާގެ މޫނުން ރުޅިވެރިކަން ފާޅުވެ އެވެ. އަތުގެތެރޭ އޮތް ފޯނުގައި ހިފަހައްޓާލެވުނީ ނުހަނު ބާރަށެވެ. އާދަޔާ ޚިލާފު ބާރެއް ލިބިފައިވާނަމަ ޒަރަކްގެ މުށުތެރޭ އެ ފޯނު ފުނޑުފުނޑުވާނެކަން ޔަޤީނެވެ. އެއްފަރާތަށް އެނބުރިލި ގޮތަށް ޒަރަކް ވައަތު ފައިން އަޅުވާލީ ކައިރީގައި ހުރި ކޫލަރުގަ އެވެ. ހިމޭންކަން ވެރިވެފައި އޮތް އެ ސަރަޙައްދުން ބާރު އަޑެއް ކިޔައިގެން ދިޔަ އެވެ. ކައިރީގައި ހުރި ނަރުހުންގެ ޖަގަހައިން ދެތިން ނަރުސް ކުދީން ދުވެފައި ނުކުތްތަން ފެނުނެވެ. އެމީހުންނަށް ޑަކްޓަރ ޒަރަކް ފެނި ހައިރާންކަމެއްގައި ތިއްބެވެ.
"ފަކ*..." ޒަރަކް އަމިއްލަ ނަފްސަށް އިވޭވަރަށް ކިޔާލި އެވެ. ދެން ހަލުވި ހިނގުމުގައި އޭނާ އެތަނުން ދިއުމަށް އަވަސްވެލި އެވެ.
"ޑަކްޓަރ ޒަރަކް ދޯ އެއީ." ނަރުސް ކުދީންގެ ތެރެއިން ކުއްޖަކު އަހާލީ ކައިރީގައި ތިބި ނަރުހުން ގާތު އެވެ.
"ހޫމް. ކިހިނެއްވީބާ؟." ކަންބަލަން ނުކުމެއް ތިބިތަނުން އެހެން ކުއްޖަކު ބުނެލި އެވެ. އެ އެންމެންނަށް ވެސް ޑަކްޓަރ ޒަރަކްގެ ޢަމަލުތައްވީ އާ ކަމަކަށެވެ.
* * * * *
އަސުރުން ފައިބައިގެން ޒިކުރުތައް ކިޔަން ރަހާ ނުކުމެ އިނީ ބެލްކަނި ކައިރީ ހުރި އުނދޯލި ގޮނޑީގަ އެވެ. އެކަން ނިމުމުން ވެސް އޭނާ އިނީ ތެދުވަން ބުރަވެފައި އިންހެނެވެ. އަނެއްކޮޅުން ފިކުރުތަކުން ހިތާއި ސިކުނޑިއަށް ހަމަޖެހުމެއް ލިބޭ ގޮތެއް ނުވެ އެވެ. އެހެންވިޔަސް ރަހާ މަސައްކަތް ކުރީ އެ ޚިޔާލުތައް އެއްފަރާތް ކުރެވޭތޯ އެވެ. އަމިއްލަ ދުޅަހެޔޮކަމަށް ބޭކާރު ފިކުރުތަކުން ނޭދެވޭ އަސަރުކުރުން ދުރުކޮށްދިނުމުގެ ވިސްނުމުގަ އެވެ. އާ ފުރޭ ވަރުން އުނދޯލި ގޮނޑީގައި ނީނދެވިގެން އޭނާ ތެދުވި އެވެ. އޭނާއަށް ވަރުބަލިކަން އިޙްސާސް ކުރެވެނީ މާބޮޑަށެވެ. ކޮޓަރިއަށް ވަދެ އެނދުގައި އޮށޯވެލީ އެހެންވެ އެވެ. ނިދާލަން ބޭނުންވި އެވެ. އެހެންވިޔަސް ނިދުމަކީ ފަސޭހަކަމަކަށް މިހާރު ރަހާއަށް ނުވެ އެވެ. ދެ އަތަށް ފުރޮޅިފުރޮޅި ވަގުތު ފާއިތުވަމުންދިޔަ އެވެ. އެހެންއޮއްވާ އޭނާގެ ސަމާލުކަން އަތުލީ ކޮޓަރިން ބޭރުން އަޑެއް އިވިގެންނެވެ. މީހަކު އުޅޭކަމުގެ ހިލަންވީ އެވެ. އެހެންވެ އެނދުން ތެދުވެ އޭނާ ކޮޓަރިން ބޭރަށް ނުކުތެވެ. ފިޔަވަޅުތައް ހުއްޓުނީ ސިޓިންރޫމު ސޯފާގައި އިން ވާކިފް ފެނިފަ އެވެ. އޭނާގެ ފޮށި އެއްފަރާތުގައި ބަހައްޓާލާފައި ހުއްޓެވެ.
"ވާކިފް..." ލިބުނު ހައިރާންކަމާއެކު ރަހާއަށް ގޮވާލެވުނެވެ.
"ހެލޯ އަނބިމީހާ." ވާކިފް ހިނިތުންވެލި އެވެ.
"ކޮންއިރަކު އައީ؟." ރަހާއަށް އަހާލެވުނެވެ.
"ނިދަންތަ އޮތީ؟." ރަހާއަށް ޖަވާބެއް ނުދީ ވާކިފް ކުރީ ސުވާލެވެ.
"ވަރުބަލިވެގެން ޖައްސާލީ... ކީއްވެ މިއަދު އަންނަ ވާހަކަ ނުބުނީ. އަހަރެން ބުނިން ދޯ ކުރީން އަންގާލައްޗޭ. ވާކިފް ބަލާ އެއަރޕޯޓަށް އަހަރެން ދާން ބޭނުންނުވީތަ؟. އެހެންވެތަ އަންގާނުލާ ތިއައީ." ރަހާއަށް ބުނެވުނެވެ.
"ރަހާ ބަލިކޮށް އުޅޭތީ އުނދަގޫކުރަން ބޭނުންނުވީ. އަނެއްކާ ވިއްސާރަކޮށް އުޅޭކަމަށް މޫސުން ދައްކާތީ ރަހާ ބޭރަށް ނުކުމެއްޖެއްޔާ ބަލިވެދާނޭ ހީކޮށް އަޅާނުލީ." ވާކިފް ކަނާއަތް ކުރިޔަށް ދަމާލައި ރަހާގެ އަތުގައި ހިފާލި އެވެ.
"ބަނޑުހައިތަ؟. މިގަޑީ އެއްޗެއް ބޭނުންތަ؟." ރަހާ އަހާލި އެވެ.
"ފަހުން... އިހަށް އާދެބަލަ." ރަހާގެ އަތަށް ދަމާލައި ވާކިފްގެ ގާތަށް ގެނެސް އޭނާގެ އުނގުގައި އަނބިމީހާ ބައިންދާލި އެވެ. ނިކަން ލޯބިން ރަހާގެ އުނަގަނޑުގައި ދެ އަތް ވަށާލައި ބައްދާލަމުން ރަހާގެ ކޯތާފަތުގައި ވާކިފް ބޮސްދީފި އެވެ.
"ސޮރީ އިނގޭ އެހާވަރަށް ނުގުޅުނީމަ. އަހަރެންގެ މަތިން ވަރަށް ހަނދާންވިދޯ؟. އަހަރެން ނެތީމަ ރަހާ ކީއްކޮށްލީ؟." ވާކިފް އަހާލި އެވެ.
ރަހާގެ ސިކުނޑީގައި ހިނގައިގަތީ އެހެން ޚިޔާލުތަކެވެ. އާވެގެން އައީ ވާކިފް އެންމެފަހުން ފޯނު ނެގި ރޭގެ ހަނދާނެވެ. އެރޭ ފޯނުން އިވިގެންދިޔަ އަންހެން އަޑެވެ. ވާކިފްއަށް ގޮވާލި ގޮތެވެ. އޭނާ މާގިނައިރު ފޯނުކޯލުގައި ހުރެގެން ކުރި ޝަކުވާ އެވެ. އެއީ ކާކުބާއޭ ރަހާގެ ހިތަށް އެރި އަދަދެއް ނޭނގެ އެވެ. މީހަކާއެކު ރޭގަނޑު ކެއުމަކަށް ދިޔަ ވާހަކަ ވާކިފް ނުބުނާތާ ދަތުރުގައި އޭނާ ކުރި ކަންތައްތަކުގެ މާބޮޑު ތަފްޞީލެއް ވެސް ރަހާއަށް ކިޔާދީފައެއް ނެތެވެ.
"އެހާ މިސްއެއްނުވޭ." ރަހާ ގަސްދުގައި ހިތާ ދެކޮޅަށް ބުންޏެވެ.
"އައްދޭ... އެހެންތަ... އެކަމަކު ބުނަން. އަހަރެން ވަރަށް މިސްވި ރަހާ." ވާކިފް މިހެންބުނެ ރަހާގެ ކޯތާފަތުގައި އަނެއްކާ ވެސް ބޮސްދީފި އެވެ. އަދި މަޑުމަޑުން ރަހާގެ ދަތްދޮޅީގައި ހިފައި ވާކިފްގެ މޫނާ ދިމާއަށް އަނބުރާލި އެވެ. އަނބިމީހާގެ ތުންފަތުގައި ލޯބީގެ ސަލާމެއްކޮށްލި ފަދައިން އޭނާ ލޯބިކޮށްލި އެވެ. އެކަމުން ރަހާގެ ހިތް އަވަސްވި އެވެ.
"ވާކިފް..." ފިރިމީހާ މާބޮޑަށް ގައިގޯޅިވެލިމުން ރަހާއަށް ގޮވާލެވިއްޖެ އެވެ. މަސްތެއްގައި ޖެހިފައިވާ މީހަކު ފަދައިން ވާކިފް ހޫން ލައްވާލި އެވެ. އޭނާއަށް ރަހާގެ އަޑު އިވުނުކަން އަންގާލި ފަދައަކުންނެވެ.
"މިގަޑީގަތަ؟. ދެންމެއެއްނު ތިއައީ... އަހަރެން ރެޑީވެލަންތަ؟." ރަހާ ބުންޏެވެ.
"މިގަޑިވެސް އޯކޭއެއްނު. ރެޑީނުވިޔަސް އޯކޭވާނެ. އަހަރެންނަށް ތީ އާ މީހެއްނޫނެއްނު." ވާކިފް ބުންޏެވެ.
"އެހެންވިޔަސް މިތާކުނޫން. ހިނގާ ކޮޓަރިއަށް." ރަހާ ނިކަން އަވަހަށް ބުންޏެވެ. އޭނާ މަޑުމަޑުން ވާކިފް ދުރަށްލާން ކޮށްޕާލި އެވެ. އެއާއެކު ވާކިފް ދުރަށް ޖެހިލައިފި އެވެ. ރަހާއަށް އޭނާ ބަލާލަންވާއިރަށް ސޯފާމަތިން ތެދުވެގެން ދުވަމުން ކަހަލަ ގޮތަކަށް ގޮސް ކޮޓަރިއަށް ވަދެއްޖެ އެވެ. ވާކިފް ވެސް މަޑުނުކޮށް ތެދުވެ ހިނގައިގަތީ އެވެ.
ކޮޓަރިއަށް ވަން ގޮތަށް ވާކިފްގެ އެދުންތައް ކުރިޔަށް އިސްކުރި އެވެ. އޭނާ ރަހާ ގޮވައިގެން އެނދުގައި އޮށޯވެލި އެވެ. ނަމަވެސް ރަހާއަށް ހަމަޖެހެވޭ ގޮތެއްނުވި އެވެ. އޭނާއަށް ވިސްނެނީ ކީމޯ ނަގަން ފެށުމުން ހަށިގަނޑަށް އައިސްފައި ހުރި ބަދަލުތަކާމެދު އެވެ. އިންޖެކްޝަންއާއި އައިވީ ގުޅާފައި ހުރި ނިޝާންތައް ފެންނަން ހުރީމަ އެވެ. އެހިސާބުގައި ބައެއް ނާރުތައް ފާޅުވާން ހުރިއިރު ރަތްކަމެއް ވެރިވެފައި ހުރީތީ އެވެ. ހަމުގެ ކުލަ ހިސާބަކަށް ބަދަލުވެފައި ހުރީމަ އެވެ. ވާކިފްއަށް އެތަންތަން ފެނުމުން ވާނޭ ގޮތެއް ނޭނގޭތީ ރަހާ ހިތްބިރުގަންނަނީ އެވެ.
"ލައިޓް ނިވާލަންވީނު." ރަހާއަށް ބުނެވުނެވެ.
"ރަހާ... ކޮންކަމަކާތަ ތިހާ ހާސްވަނީ. އަލަށް ކަމެއްކުރާކަށްނޫނެއްނު މިއުޅެނީ. އަހަރެން މީ ފިރިމީހާ ދޯ. ތިހާ ލަދުން ނޫޅެބަލަ. އަހަރެންނަށް ބަލަން އުނދަގޫވެގެން ނޫޅެން. ރަހާގެ ހުރިހާ ސިފައެއް ވެސް އަހަރެންނަށް ކަމުދޭ." ވާކިފް ކުޑަކޮށް ހިނިއައިސްފައި ބުންޏެވެ.
"އެހެންވިޔަސް ހެޔޮ. ޕްލީޒް. ޕްލީޒް ވާކިފް... ބޮކި ނިވާލަ ފާނަންތަ." ރަހާ އާދޭސްކޮށްލި އެވެ. ގޮތް ދޫކުރަން މަޖުބޫރުވީ މީހަކުހެން ވާކިން އެންމެ ރަނގަޅޭ ބުނެ ކޮޓަރީގެ ބޮކިތައް ނިވާލި އެވެ.
* * * * *
ސުކޫލުގެ ގޯތިތެރެ އެވެ. ރަހާ ކުލާހަށް ދަނިކޮށް އޭނާގެ ނަމުން މީހަކު ގޮވާލި އަޑު އިވުނެވެ. އެނބުރުނު އިރު ވާކިފް އެވެ. ހައިރާންކަމާއެކު ބަލަން ރަހާއަށް ހުރެވުނީ އެވެ.
"ލޯބިވެރިޔެއް ހުރޭތަ؟." އިނގިރޭސި ބަހުން ވާކިފް އަހާލި އެވެ. ދޭނޭ ޖަވާބެއް ނޭނގިފައި ރަހާ ހުރީ އެވެ.
ރަހާގެ ނަމުން ވާކިފް ގޮވާލި އަޑު އިވުނެވެ. އެގޮތަށް ތަކުރާރުކޮށް ވާކިފް ގޮވާ އަޑު އިވެމުންދިޔަ އެވެ. ރަހާގެ ދެ ލޯ ހުޅުވުނީ ދެނެވެ. އޭނާ އޮތީ ހުވަފެނެއްގައިކަން ރަހާއަށް އެނގުނެވެ. އެކަމަކު އެ ހުވަފެނަކީ ކުރީގެ ހަނދާނެކެވެ. ފަތިސް ނަމާދަށްފަހު ރަހާ ޖައްސާލީ ކޮޅަށް ހުންނާނޭ ވަރެއް ނެތިގެންނެވެ. ނިދުނީ ކޮންއިރަކުކަމެއް ޚުދު އޭނާ ނުދެނަހުއްޓެވެ.
"ރަހާ. ތެދުވެލަންވީނު... ހުންއައިސްފައެއްނު ތި އޮތީ." ވާކިފް ބުންޏެވެ.
ރަހާއަށް ހަށިގަނޑު މާބޮޑަށް ވަރުދެރަވެއްޖެހެން ހީވަނީ ކީއްވެކަން ރެއަކާލީ ދެނެވެ. އެއާއެކު އަމިއްލަ ނޭވާގައި ހުރި ހޫނުކަން ރަހާއަށް އިޙްސާސް ކުރެވުނެވެ. ވާކިފް އޯގާތެރިކަމާއެކު ރަހާގެ މޫނުގައި ފިރުމާލި އެވެ.
"ކައިގެން ބޭހެއް ކައިގެން އަލުން އޮށޯވެލާނީ. އެހެންވީމަ އިހަށް ތެދުވެލާ... ހިނގާ އެއްޗެއް ކާލަން." ވާކިފް މިހެންބުނެ ރަހާ ތެދުވަން އެހީވި އެވެ. އެނދުގައި އިށީނދެ އިނދެފައި ރަހާ ކޮޅަށް ތެދުވީ ފާޚާނާއަށް ވަންނަން ދާށެވެ. އޭނާއާ އެއްވަރަށް ވާކިފް ހިނގައިގަތެވެ.
"ކީއްވެތަ ކުއްލިކުއްލިއަށް ހުންއަންނަނީ. މިހާރަކަށް އައިސް ތި ހުމެއް ދުވަހަކު ނުފިލާ... ރޭގައި މާބޮޑަށް ފިނިވީތަ؟." ވާކިފް އަހާލި އެވެ.
ރަހާ ވަކި އެއްޗެއް ނުބުންޏެވެ. އޭނާ ފާޚާނާއަށް ވަދެ ދޮރުލައްޕާލީ އެވެ. ރަހާ ނުކުންނަން ދެން ވާކިފް ފާޚާނާ ދޮރު ކައިރީ މަޑުކޮށްގެން ހުއްޓެވެ. ރަހާ ނުކުތުމުން އޭނާ ވާހަކަދައްކަން ފެށި އެވެ.
"މިއަދު އަހަރެން އޮފީހަށް ދިއުމުގެ ވިސްނުމެއްނެތް. މެންދުރު ކާންދާން ހިނގާ. ކައިގެން އަހަރެން ރަހާއާއެކު ދާނަން ޑަކްޓަރަށް ދައްކަން. ވާގޮތެއް އެނގިދާނެ ރަނގަޅު ޑަކްޓަރަކަށް ދައްކާ ޗެކަޕެއް ހަދަނިކޮށް. އަހަރެންގެ އަނބިމީހާ ހިކެމުންގޮސް އިލޮށިކޮޅަށްވާން ކައިރިވެއްޖެ. ކިހިނެއް އަޅާނުލާ ހުންނާނީ. އަހަރެން މީ އަނބިމީހާއަށް އަޅާނުލާ ފިރިއެކޭ މީހުން ހީކުރާނެ ޖާގަދޭންވީ ކީއްކުރަން." ވާކިފް ބުންޏެވެ. އެ އަޑުގައި ސަމާސާކަމެއް ހުއްޓަސް ރަހާ އަޅައެއް ނުލި އެވެ.
"ނޫޅެން ދާކަށް." ފަރުވާކުޑަ ރާގެއްގައި ރަހާ ބުނެލި އެވެ.
"ބޮޑާހާކަނީތަ؟. އަހަރެން މިހާ ލޯބިން ބުނީމަ ވެސް... ރަހާ. އަޑު އަހާބަލަ. ޑަކްޓަރަށް ނުގޮސް ނޭނގޭނެއެއްނު." ވާކިފް ބުންޏެވެ. ރަހާ އައިސް އަނެއްކާ ވެސް އެނދުގައި އިށީނީ އެވެ. އެހެންވެ ވާކިފް ވެސް އައިސް އަނބިމީހާގެ ގާތުގައި ޖެހިގެން އެނދުގައި އިށީނދެއްޖެ އެވެ. އަދި އޯގާތެރިކަމާއެކު ރަހާގެ ބޮލުގައި ފިރުމާލައިފި އެވެ.
"އަހަރެންނަށް ތަދުވެޔޭ." އިސްއޮބާލައިގެން އިނދެފައި ކުއްލިއަކަށް ރަހާ އިސްއުފުލައި ވާކިފްއަށް ބަލާލަމުން ބުނެލި އެވެ. އޭނާގެ އަޑުގައި ހިތްދަތިކަންވީއިރު އެ ދެ ލޮލުގައި ކަރުނަ ވިދަނީ އެވެ. ވާކިފްއަށް ހާސްކަމެއް ލިބުނެވެ.
"ކޮންތާކަށް ތަދުވަނީ؟. އަހަރެން ކައިރީ ބުނީމަ ދޯ އެނގޭނީ. އަހަރެން ހާސްނުކޮށް ރަހާ ނިކަން ކިޔާދީބަލަ." ވާކިފްއަށް ބުނެވުނެވެ.
"އަހަރެންގެ ގަޔަކު ވަރެއްނެތޭ. ބޮލުގައި ރިއްސަނީ، އުނަގަނޑުގައި ރިއްސަނީ، ދެފައިގައި ރިއްސަނީ... ހުރިހާ ތަނެއްގައި ރިއްސަނީ. ހަށިގަނޑު އެތެރެ ފާރުވެގެން އުޅޭ ކަހަލަ." ރަހާއަށް މިހިސާބަށް ބުނެވުނު ގޮތަށް ބާރަށް ރޮވިއްޖެ އެވެ. އޭނާގެ ކެތްތެރިކަން ކޮޅުންލީ ފަދަ އެވެ.
"ދެން ނުރޮއެ. އެހެން އިރަކުން ޑަކްޓަރަށް ދައްކަން ދާނީ. އެކަމަކު މިވަގުތު ހިނގާ އެއްޗެއް ކާލައިގެން ބޭސްކާން. ހުންމަޑުވާނީ ވެސް އޭރުން." ރަހާ ގެނެސް ގައިގާ ޖައްސާލައިގެން އިނދެ އޭނާގެ ބޮލާއި ބުރަކަށީގައި ފިރުމަމުން ވާކިފް ވާހަކަދެއްކި އެވެ.
ވާކިފް ބޭރުން ގެނައި ސޫޕް އެތި ތަށްޓަކަށް އަޅައިގެން ކޮޓަރިއަށް ވަނެވެ. އެނދުގައި ލެނގިލައިގެން އިން ރަހާގެ މަގަތުން ވާކިފް އިށީނެވެ. ރޮއެރޮއެ ރަހާގެ މޫނުކޮޅުވަނީ ދެ ލޮލާއެކު ރަތްވެފަ އެވެ. އޭނާ ހަމައަކަށް އެޅުމުން ވާކިފް އަވަސްވެލީ ރަހާއަށް ކާއެއްޗެއް ދެވޭތޯ އެވެ.
"ހޫނެއްނޫން. ބޮވޭ ވަރަށް ހުރީ. އަވަހަށް އަނގަ ހުޅުވާ." ސޫޕް ތަށިން ސަމްސަލެއް ނަގައި ރަހާގެ އަނގައާ ވާކިފް ކައިރިކޮށްލި އެވެ. ބަސްއަހާ ކުޑަކުއްޖަކުހެން ރަހާ އަނގަ ހުޅުވާލި އެވެ.
ނުތަނަވަސްކަމުގެ ތެރެއިން ރަހާގެ ހިތަށް ހަމަޖެހުމެއް ލިބުނުކަމުގެ އިޙްސާސް ކުރެވުނެވެ. ވާކިފްގެ އަޅާލުން ފެނި އެވެ. އެހާ ގާތްކޮށް އެހާމެ އޯގާތެރިކަމާއެކު ރަހާ ހޭހަންކުރާން ވާކިފް އުޅުނު ހަނދާނެއް އޭނާ ނުވެ އެވެ. އެފަދަ ވަގުތެއް ވެސް ވާކިފަށް ނުލިބެ އެވެ. ވާކިފް ދިއްކޮށްލި ދެވަނަ ސަމްސާ ވެސް ބޯލުމަށް ރަހާ އަނގަޖެހި އެވެ. އެނދު އަރިމަތީ ހުރި ކަބަޑުގެ މަތިން ފޯނު ވައިބްރޭޓްވާން ފެށީ އެވަގުތެވެ. އެ ދިމާއަށް ވާކިފްއާއި ރަހާއަށް ބަލާލެވުނީ އެއްފަހަރާ އެވެ. އެތަނުގައި އޮތީ ވާކިފްގެ ފޯނެވެ.
(ނުނިމޭ)
