އާއިލާއަށް ގެއްލި، ވީނުވީއެއް ނޭނގިގެން ފޮޓޯ ޖަހައި ހޯދަން އިއުލާން ކުރި މީހަކު، މަސްތުވާތަކެތީގެ މައްސަލައެއްގައި ހައްޔަރުކޮށްފި އެވެ.
ރޯދަ މަހުގެ ކުރީކޮޅު، ގެއްލިގެން ހޯދަން ފޮޓޯއާއެކު ފުލުހުން އިއުލާންކޮށް، ހޯދުމަށް އާއްމުންގެ އެހީތެރިކަމަށް އެދުނު މީހަކީ، ނ. މަނަދޫ، ރީހުއްސަބާ، އަބްދުالله ޝިހާދު (37 އ) އެވެ.
އޭނާގެ ހަބަރެއް ނުވެގެން ފުލުހުން އާއްމުންގެ އެހީތެރިކަމަށް އެދި ބުނީ މިމަހުގެ އަށްވަނަ ދުވަހުގެ 16:51 ހާއިރުން ފެށިގެން އޭނާގެ އެއްވެސް ހަބަރެއް އާއިލާއަށް ނުވާތީވެ މިމަހުގެ 10 ވަނަ ދުވަހުގެ 20:05 ހާއިރު ރިޕޯޓްކޮށްފައިވާ ކަމަށެވެ. ޝިހާދު ދިރިއުޅެނީ މާލޭގައި ކަމަށާއި އޭނާގެ ފޯނަށްވެސް ނުގުޅޭ ކަމަށް އާއިލާއިން ފުލުހުންނަށް މައުލޫމާތު ދީފައިވާ ކަމަށްވެސް ފުލުހުން އޭރުން ބުންޏެވެ.
އޭނާ ފަހުން ފެނުނު ކަމެއް ނުވަތަ ނޫން ކަމެއް ނޭނގެ އެވެ. އެކަމަކު މަސްތުވާތަކެތީގެ މައްސަލައެއްގައި މި ހަފްތާގައި އޭނާ ވަނީ ހައްޔަރުކޮށްފަ އެވެ.
ޝިހާދު ހައްޔަރުކޮށް ބަންދާ މެދު ގޮތެއް ނިންމުމަށް އިއްޔެ ކޯޓަށް ހާޒިރު ކުރުމުން ކޯޓުން ވަނީ އޭނާގެ ބަންދަށް 10 ދުވަސް ޖަހާފަ އެވެ.
ޝިހާދުގެ މައްޗަށް ތުހުމަތު ކުރަނީ ރާއްޖެއަށް މަސްތުވާތަކެތި އެތެރެކުރުމާއި ވިޔަފާރި ކުރި ކަމަށެވެ. އެއީ އުމުރު ދުވަހުގެ ޖަލު ހުކުމެއް އަންނަ ފަދަ ޖިނާއީ ބޮޑު ކުށެކެވެ.
