ނޮން ރެޒިޑެންޓް ސަފީރު ކަމަށް ހަސަން ސޯބިރާއި އުމަރު އަބްދުއްރައްޒާގު އައްޔަންކުރަން ރުހުން ދިނުމަށް ރައްޔިތުންގެ މަޖިލީހުގެ ހާރިޖީ ގުޅުންތަކާ ބެހޭ ކޮމިޓީން ނިންމައިފި އެވެ.
ކޮމިޓީގެ މިއަދުގެ ބައްދަލުވުމުގައި މި ދެ ބޭފުޅުން ރުހުން ދޭން ނިންމާފައިވީ ނަމަވެސް ކޮމިޓީގެ ނިންމުމާ މެދު ގޮތެއް ނިންމާނީ މަޖިލީހުގެ ތަޅުމުންނެވެ.
ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހް ރައްޔިތުންގެ މަޖިލީހަށް ފޮނުއްވި ސިޓީގައި ވަނީ ކޮރެއާގައި ހުންނަވާ ރާއްޖޭގެ ނޮންރެޒިޑެންޓް ސަފީރު ކަމަށް ހަސަން ސޯބިރު އައްޔަން ކުރުމަށާއި ނެދަލެންޑްސްއާއި ލަގްޒަންބާގުގައި ހުންނަވާ ރާއްޖޭގެ ނޮން ރެޒިޑެންޓް ސަފީރު ކަަމަށް އަބްދުއްރައްޒާގު އައްޔަންކުރުމާ މެދު މަޖިލީހަށް ފެންނަ ގޮތެއް އަންގަވައިދެއްވުމަށެވެ.
ރާއްޖޭގެ ކުރީގެ ޓޫރިޒަމް މިނިސްޓަރު ހަސަން ސޯބިރު މިވަގުތު ހުންނެވީ ރާއްޖެއިން ޖަޕާނަށް ކަނޑައަޅުއްވާފައިވާ ސަފީރުގެ މަގާމުގަ އެވެ. އުމަރު އަބްދުއްރައްޒާގު ހުންނެވީ ރާއްޖެއިން ބެލްޖިއަމާއި ޔޫރަޕިއަން ޔޫނިއަނަށް ކަނޑައަޅުއްވާފައިވާ ސަފީރުގެ މަގާމުގަ އެވެ.
ނޮން ރެޒިޑެންޓް ސަފީރުންނަކީ އެ ބޭފުޅުން އައްޔަންކުރައްވާ ގައުމެއްގައި ތިއްބަވައިގެން މަސައްކަތް ކުރައްވާ ބައެއް ނޫނެވެ.
