ޓައިސާ ފާމިގާ "ދަ ނަން 2" ގައި ސިސްޓާ އައިރީންގެ ރޯލުގައި ސްޓޯމް ރީޑް އާއެކު ފެންނާނެ އެވެ.
"ދަ ނަން 2" އަކީ 2018 ވަނަ އަހަރު ނިކުތް ބިރުވެރި ފިލްމް "ދަ ނަން"ގެ ދެވަނަ ބައެވެ.
މި ދެ ފިލްމަކީ "ދަ ކޮންޖުއަރިން" ފްރެންޗައިޒްގެ ފިލްމެކެވެ. މައިކަލް ޗަވެޒް ޑައިރެކްޓްކުރާ "ދަ ނަން 2" ރިލީޒްކުރާނީ "ދަ ކޮންޖުއަރިން" ފްރެންޗައިޒްގެ ހަތްވަނަ ފިލްމް "ދަ ކޮންޖުއަރިން: ދަ ޑެވިލް މޭޑް މީ ޑޫ އިޓް" އަށް ފަހު އެވެ. މި ފްރެންޗައިޒް އަކީ ބޮޑުސްކްރީނުގައި އެންމެ ކާމިޔާބު ބިރުވެރި ފިލްމް ސީރީޒެވެ.
ޓައިސާ ފާމިގާ އާއި "ދަ ކޮންޖުއަރިން"ގެ ވިރާ ފާމިގާއަކީ ދެބެންކަމުގައި ވިޔަސް، މި ފިލްމް ސީރީޒްގައި ދެ މީހުން އަދާކުރަނީ ގުޅުމެއްނެތް ތަފާތު ދެ ރޯލެކެވެ. ޓައިސާ މިހާރު ދަނީ އެޗްބީއޯގެ "ދަ ގިލްޑަޑް އޭޖް" އަށް ޝޫޓްކުރަމުންނެވެ.
މި ފިލްމުގެ ސްކްރިޕްޓް ލިޔެފައިވަނީ އަކެލާ ކޫޕާ އާއި އިއެން ގޯލްޑްބާގް އާއި ރިޗަޑް ނައިން އެވެ. މި ފިލްމް ރިލީޒްކުރުމަށް ހަމަޖެހިފައިވަނީ ސެޕްޓެމްބަރު 08، 2023 ގައެވެ.
