"ބްލްކްޕެންތާ"ގެ ދެވަނަ ބައި "ބްލެކްޕެންތާ: ވަކަންޑާ ފޯއެވާ" އަކީ ފޭނުން ކެތްތެރިކަން ކުޑަވެފައިވާ ފިލްމެކެވެ.
"ބްލެކްޕެންތާ"ގެ ރޯލް އަދާކުރި ޗެޑްވިކް ބޯޒްމަން ކެންސަރު ބައްޔާ ހަނގުރާމަކުރުމަށްފަހު އޮގަސްޓް 2020 ގައި މަރުވުމުން، ގިނަ ފޭނުންގެ ހިތުގައި އުފެދުނު ސުވާލަކީ މި ރޯލު ދެން އަދާކުރާނީ ކާކުބާ އެވެ.
ބްލެކްޕެންތާ ކެރެކްޓާ ނިމުނީބާ އެވެ. ނޫނީ އެ ރޯލް ދެން އަދާކުރާނީ ބްލެކްޕެންތާގެ އަންހެން ކޮއްކޮ ޝޫރީ ހެއްޔެވެ.
"ބްލެކްޕެންތާ: ވަކަންޑާ ފޯއެވާ"ގެ ޓްރޭލާ އިން ފެންނަނީ ޗެޑްވިކް ބޯޒްމަންގެ ކެރެކްޓާ، ކިން ޓިޗާލާ މަރުވެގެން އެންމެން ހިތާމަ ފާޅުކުރާތަނެވެ. އާ ނުބައި މީހެއް ފެނެއެވެ. ވަކަންޑާގައި ފެން ބޮޑުވެ، ހަނގުރާމަކުރާތަން ވެސް ފެނެ އެވެ. ދެން އާ ކެރެކްޓާއެއް ކަމުގައިވާ "އަޔަން ހާޓް" ފެނެ އެވެ.
ޓްރޭލާ ނިމޭއިރު، ބްލެކްޕެންތާގެ ސޫޓް ލައިގެން އަންހެނެއް ހުރެ އެވެ. އެއީ ކާކުކަމެއް ހާމައެއް ނުވެ އެވެ. އެއީ ބްލެކްޕެންތާގެ ކޮށްކޮ ޝޫރީ، ލޯބިވެރިޔާ ނާކިއާ ނޫނީ ޑޯރާ މިލާޖޭގެ ލީޑަރު އޮކޮޔޭ އަށް ވެސް ވެދާނެ އެވެ.
އަޔަންހާޓަށް ބަލާއިރު، އެއީ ޓޯނީ ސްޓާކްގެ މޮޅުކަމާއި އަޔަންމޭންއަށް ބިނާކޮށް ރީރީ ވިލިއަމްސް ކިޔާ 15 އަހަރުގެ ކުއްޖެއް ޝޫރީއާއެކު މަސައްކަތްކޮށް އެއާ ވައްތަރު ސޫޓެއް ޑިޒައިންކޮށް، އަޔަންހާޓްގެ ކެރެކްޓާއަށް ވަނީ އެވެ.
މި ފިލްމުން މި ކެރެކްޓާ އަލަށް ތައާރަފްކުރާއިރު، އަޔަންހާޓަށް ވަކި ފިލްމެއްވެސް ހަދާނެކަމަށް މާވެލް ސްޓޫޑިއޯ އިން ބުނެފައިވެ އެވެ.
މި އާ ކެރެކްޓާ "ބްލެކްޕެންތާ: ވަކަންޑާ ފޯއެވާ"ގެ މެދުތެރެއިން ތައާރަފްކުރުމަކީ "އެވެންޖާސް: ސިވިލް ވޯ" ގައި ޓޮމް ހޮލެންޑްގެ ސްޕައިޑާމޭން ކެރެކްޓާ ތައާރަފްކުރުން ފަދަ ކަމެއްކަމުގައި ބައެއް މީހުން ދެކެ އެވެ. މި ކެރެކްޓާ ޓޯނީ ސްޓާކްއާ އެއް ހަމައަށް ނުހިފޭއްޓުނަސް، އެއާ ގާތްކުރާނެތޯ ވެސް ސުވާލު އުފައްދަ އެވެ.
މި ފިލްމް ރިލީޒްކުރުމަށް ހަމަޖެހިފައިވަނީ ކުރިއަށް އޮތް ނޮވެމްބަރު 11 ވަނަ ދުވަހު އެވެ.