ދައުލަތުގެ މިއަހަރުގެ ބަޖެޓްގައި ސިޔާސީ ޕާޓީތަކަށް ދޭން ކަނޑައެޅި ފައިސާ ދޫކުރަން އިލެކްޝަންސް ކޮމިޝަނުން ފިނޭންސް މިނިސްޓްރީއަށް ފޮނުވައިފި އެވެ.
މިއަހަރުގެ ބަޖެޓުން ފައިސާ ދޭން ނިންމާފައިވަނީ ހަ ޕާޓީއަކަށެވެ. އެއީ އެމްޑީޕީ، ޕީޕީއެމް، ޖުމްހޫރީ ޕާޓީ، އެމްޑީއޭ، އެމްއެންޕީ އަދި އަދާލަތު ޕާޓީ އެވެ.
ޕާޓީތަކަށް ފައިސާ ދޫކުރަން އިލެކްޝަންސް ކޮމިޝަނުން ފިނޭންސަށް ތަފްސީލް ފޮނުވި ނަމަވެސް އެމްއެންޕީއަށް ފައިސާ ދޫކުރަން ފިނޭންސަށް ފޮނުވާފައެއް ނުވެ އެވެ. އެމްއެންޕީއަށް ފައިސާ ދޫކުރަން ފޮނުވާފައި ނުވަނީ ބައެއް މައުލޫމާތުތައް ފުރިހަމަ ނުވާތީ ކަމަށް ކޮމިޝަނުން ބުނެ އެވެ.
ދައުލަތުގެ މިއަހަރުގެ ބަޖެޓްގައި ސިޔާސީ ޕާޓީތަކަށް ދޫކުރަން ކަނޑައަޅާފައިވަނީ 36 މިލިއަން ރުފިޔާ އެވެ.
ދައުލަތުގެ ބަޖެޓުން ފައިސާ ލިބޭނީ އިލެކްޝަންސް ކޮމިޝަންގެ ރަޖިސްޓްރީ ކޮށްފައިވާ ސިޔާސީ ޕާޓީތަކުގެ ތެރެއިން މި އަހަރުގެ ބަޖެޓް ރައްޔިތުންގެ މަޖިލީހުން ފާސްކުރި ދުވަހާއި ހަމައަށްް 10،000 މެމްބަރުން ހަމަވާ ޕާޓީތަކަށެވެ.
އީސީ އިން ހިއްސާކުރި ތަފާސްހިސާބުތަކުގައިވާ ގޮތުގައި، އެންމެ ބޮޑު އަދަދެއްގެ ފައިސާ ލިބެނީ މެންބަރުން އެންމެ ގިނަ ވެރިކަން ކުރާ އެމްޑީޕީއަށެވެ. އެގޮތުން އެ ޕާޓީއަށް 14.2 މިލިއަން ރުފިޔާ ލިބެ އެވެ. ދެވަނައަށް އެންމެ ގިނަ ފައިސާ ލިބެނީ އިދިކޮޅު ޕީޕީއެމްއަށެވެ. އެއީ 9.5 މިލިއަން ރުފިޔާ އެވެ.
ސަރުކާރު ކޯލިޝަންގައި އޮތް ޖުމްހޫރީ ޕާޓީއަށް 5.7 މިލިއަން ރުފިޔާ ލިބޭއިރު އަދާލަތު ޕާޓީއަށް ލިބެނީ 2.4 މިލިއަން ރުފިޔާ އެވެ. ޖޫރިމަނާއެއްގެ ގޮތުގައި 20،000 ކެނޑުމަށްފަހު އެމްއެންޕީއަށް ވެސް 2.4 މިލިއަން ރުފިޔާ ލިބޭއިރު، އެމްޑީއޭއަށް 2.6 މިލިއަން ރުފިޔާ ލިބެ އެވެ.
ސިޔާސީ ޕާޓީގެ ގާނޫނު ބުނާ ގޮތުން 10،000 މެންބަރުން ހަމަވާ ޕާޓީތަކަށް މެންބަރުންގެ ނިސްބަތުން އަހަރުގެ ފުރަތަމަ ތިން މަސްދުވަހުގެ ތެރޭގައި ފައިސާ ދީ ހަލާސްކުރަން ޖެހެ އެވެ.