ޣައްޒާގައި ހަމާސް ޖަމާއަތުން ހިންގާ ހެލްތު މިނިސްޓްރީން ބުނި ގޮތުން ޣައްޒާ ހަމަނުޖެހުންތަކުގައި، ފާއިތުވި 12 ދުވަސް ތެރޭގައި ފަލަސްތީނުން 3،478 މީހަކު ވަނީ މަރުވެފަ އެވެ.
ޔަހޫދީ އަސްކަރިއްޔާއިން ޣައްޒާއަށް ރެއާއި ދުވާލު ދެމުން ގެންދާ ހަމަލާތަކުގައި 12،065 އަށް ވުރެ ގިނަ މީހުން ޒަހަމްވެފައިވާ ކަމަށް ވެސް ހެލްތު މިނިސްޓްރީން ބުނެ އެވެ.
ހެލްތު މިނިސްޓްރީގެ ތަރުޖަމާން އަޝްރަފް އަލްގުދުރާ ނޫސްވެރިންނަށް މައުލޫމާތު ދެއްވަމުން ވިދާޅުވި ގޮތުން، މިނިސްޓްރީން ހާމަކުރާ އަދަދުތަކަކީ އެ އިދާރާއަށް ކަށަވަރު ކުރެވިފައި ހުރި އަދަދުތަކެވެ.
މަރުވި މީހުންނާއި ޒަމަމްވި މީހުންގެ އަދަދު އަދި އިތުރުވުމީ ވެސް އެކަށީގެންވާ ކަމެއް ކަމަށް ތަރުޖަމާން ވިދާޅުވި އެވެ.
ޔަހޫދީންގެ ހަމަލާތަކަކީ ނަސްލު ނައްތާލުމަށް ދެމުންދާ ހަމަލާތަކެއް ކަމަށް ވެސް ތަރުޖަމާން ވިދާޅުވި އެވެ. މިއީ ފަލަސްތީން ނެތިގެން ހިނގައިދާނެ ކަމުގެ ބިރު އޮތް ހަމަލާތަކެއް ކަމަށް ވެސް އޭނާ ވިދާޅުވި އެވެ.
އަނިޔާ ލިބުނު މީހުންގެ ތެރޭގައި 70 ޕަސެންޓަކީ ކުޑަކުދިންނާއި އަންހެނުން އަދި ދުވަސްވީ މީހުން ކަމަށް ވެސް ތަރުޖަމާން ވިދާޅުވި އެވެ.
ބޮޑެތި އިމާރާތްތައް ގޮއްވާލުމުގެ ސަބަބުން ދަށުވި މީހުން އަދިވެސް ގާތަކުގެ ދަށުގައި ތިބި ކަމަށް ތަރުޖަމާން ވިދާލުވި އެވެ. ޔަހޫދީންގެ ހަމަލާތަކުގައި 433 އާއިލާއަކަށް ވަރަށް ބޮޑެތި ގެއްލުން ލިބި ބިކަވެފައިވާ ކަމަށް ވެސް އޭނާ ވިދާޅުވި އެވެ.
ޣައްޒާގެ ހެލްތު މިނިސްޓްރީ ހާމަކުރި އަދަދުތަކުގައި، ހޮސްޕިޓަލަށް ދިން ހަމަލާގައި މަރުވި މީހުންނާއި ޒަހަމްވި މީހުން ހިމަނާފައިވާކަން ކަށަވެރެއް ނޫނެވެ. މިކަމާ ބެހޭ ގޮތުން ތަރުޖަމާން ވަކި އެއްޗެއް ވިދާޅެއް ނުވެ އެވެ.
ޣައްޒާ ހޮސްޕިޓަލަށް ދިން ހަމަލާ މުޅި ދުނިޔެ ކުށްވެރިކުރި ނަމަވެސް، އެމެރިކާ އާއި ޔަހޫދީން އަތްޖަހާފައި ހެނީ އެވެ. ފަލަސްތީނުން މީހުން މެރުމަކީ ޔަހޫދީންނަށް ލިބޭ ވަރަށް ބޮޑު އުފަލަކަށް އޮންނަނީ ވެފަ އެވެ.
މިސްރުގެ ރައީސް އަބްދުލް ފައްތާހް އައްސީސީ ވިދާޅުވި ގޮތުގައި ޣައްޒާއަށް މިވަރުގެ ހަމަލާތަކެއް ދިނުމުގެ ބޭނުމަކީ، ފަލަސްތީންގެ ބިން ޔަހޫދީން އަތުލައިގަތުމެވެ. މިކަމާ މެދު ނުވިސްނައި ދޫކޮށްލައިފި ނަމަ ފަލަސްތީން ނެތިގެން ދިއުމަކީ އޮތް ބޮޑު ބިރެއް ކަމަށް ވެސް އޭނާ ވިދާޅުވި އެވެ.