ލޯނުތައް ދެއްކުމަށް ދައުލަތުން ދެ ބިލިއަން ރުފިޔާ ހަރަދުކޮށްފި އެވެ. މިއީ ނޮވެމްބަރުގެ ނިޔަލަށް ދައްކާފައިވާ ފައިސާ އެވެ.
ފިނޭންސް މިނިސްޓްރީގެ ތަފާސްހިސާބުތަކުން ދައްކާ ގޮތުގައި މިއީ ދަރަނި ދެއްކުމަށް މިއަހަރަށް ކަނޑައަޅާފައިވާ 2.1 ބިލިއަން ރުފިޔާއިން މިއަދާ ހަމައަށް ހަރަދުކޮށްފައިވާ މިންވަރެވެ.
މިއަހަރުގެ ނޮވެމްބަރުގެ ނިޔަލަށް ލޯނަށް ކުރި ހަރަދު ވަނީ މިދިޔަ އަހަރުގެ ނޮވެމްބަރުގެ ނިޔަލަށް ލޯނަށް ކުރި ހަރަދަށް ވުރެ 24.6 ޕަސެންޓް ދަށްވެފަ އެވެ. ލޯނު ދެއްކުމަށް މިދިޔަ އަހަރުގެ ނޮވެމްބަރުގެ ނިޔަލަށް ހަރަދުކޮށްފައިވަނީ 2.6 ބިލިއަން ރުފިޔާ އެވެ.
ފިނޭންސް މިނިސްޓްރީގެ ތަފާސް ހިސާބުތައް ދައްކާ ގޮތުގައި މިއަހަރުގެ ނިޔަލަށް ލޯން ދެއްކުމަށް ކޮށްފައިވާ ހަރަދަކީ ދެ ބިލިއަން ރުފިޔާ އެވެ.
ދައުލަތަށް އާމްދަނީގެ ގޮތުގައި ނޮވެމްބަރުގެ ނިޔަލަށް ލިބުނީ 30.5 ބިލިއަން ރުފިޔާ އެވެ. މީގެ ތެރޭގައި ޓެކްސްގެ އާމްދަނީގެ ގޮތުގައި ލިބުނީ 22.1 ބިލިއަން ރުފިޔާ އެވެ. އަދި ޓެކްސް ނޫން ގޮތުގައި ލިބުނު އާމްދަނީއަކީ 7.5 ބިލިއަން ރުފިޔާ އެވެ.