ކުރީގެ ފިނޭންސް މިނިސްޓަރު ޑރ. މުހައްމަދު ޝަފީގު ހައުސިން ޑިވެލޮޕްމަންޓް ފައިނޭންސް ކޯޕަރޭޝަން (އެޗްޑީއެފްސީ) ގެ ބޯޑަށް އައްޔަން ކުރައްވައިފި އެވެ.
ސަރުކާރު ހިއްސާވާ ކުންފުނިތަކުގެ ބޯޑަށް މެންބަރުން އައްޔަންކުރާ ޕްރައިވެޓައިޒޭޝަން އެންޑް ކޯޕްރަޓައިޒޭޝަން ބޯޑު (ޕީސީބީ)ގެ ވެބްސައިޓް ދައްކާ ގޮތުގައި ޝަފީގު އެ މަގާމަށް އައްޔަންކޮށްފައިވަނީ މިމަހުގެ ދެވަނަ ދުވަހު އެވެ.
ޝަފީގު ވަނީ އެޗްޑީއެފްސީގައި މީގެ ކުރިންވެސް މަސައްކަތް ކުރައްވާފަ އެވެ.
އެގޮތުން ފިނޭންސް މިނިސްޓަރަކަށް ވަޑައިގަތުމުގެ ކުރިން އޭނާ ހުންނެވީ އެޗްޑީއެފްސީގެ ފައިނޭންސްގެ ހެޑްގެ މަގާމުގަ އެވެ.
މި ސަރުކާރުގެ ފުރަތަމަ ފިނޭންސް މިނިސްޓަރު ޝަފީގު މަގާމުން އިސްތިއުފާ ދެއްވީ މިއަހަރުގެ ސެޕްޓެމްބަރު މަހުގެ 30 ވަނަ ދުވަހު އެވެ.
