ކ. ގުރައިދޫ ހާއްސަ އެހީއަށް ބޭނުންވާ މީހުންގެ މަރުކަޒުގައި ފަރުވާ ހޯދަމުންދާ މީހުންނަށް ހުނަރު ދަަސްކޮށްދިނުމުގެ ޕްރޮގްރާމެއް ފަށައިފި އެވެ.
މިގޮތުން މިދިޔަ ހަފްތާގައި ވަނީ މަރުކަޒުގައި ތިބި އަންހެނުންނަށް ހާއްސަކޮށްގެން ޕޮލިޓެކްނިކާ ގުޅިގެން ކޭކް އެޅުމުގެ ކޯހެއް ކުރިއަށް ގެންގޮސްފަ އެވެ. މި ކޯސް 10 މީހަކު ފުރިހަމަކޮށްފައިވެ އެވެ. އަދި ގަސް އިންދަން ދަސްކޮށްދިނުމުގެ ޕްރޮގްރާމްތަކާއި، ފަހަން ދަސްކޮށްދިނުމުގެ ޕްރޮގްރާމްތަކާއި، ކުރެހުމާއި އަތު މަސައްކަތުގެ ހުނަރުތައް ދަސްކޮށްދޭ ޕްރޮގްރާމްތަކެއް ބޭއްވުމަށް ހަމަޖެހިފައިވެ އެވެ.
މީގެއިތުރުން ޖިސްމާނީ އަދި ނަފްސާނީ ދުޅަހެޔޮކަން އިތުރުކޮށް، އިޖުތިމާއީ ގުޅުންތައް ބަދަހިކުރުމުގެ ގޮތުން ކަސްރަތު ޕްރޮގްރާމްތަކާއި އިޖުތިމާއީ އެއްވުންތަކެއް ވެސް މަރުކަޒުގައި ތިބޭ ފަރާތްތަކަށް ދަނީ ކުރިއަށްގެންދަމުންނެވެ.
ގުރައިދޫ މަރުކަޒުގައި ހުނަރު ޕްރޮގްރާމްތައް ކުރިއަށް ގެންދިއުމުގެ އެންމެ މުހިއްމު މަގުސަދަކީ މަރުކަޒުގައި ތިބި މީހުންނަކީ އަބުރުވެރި، އުފާވެރި، އަދި އަމިއްލަ މިނިވަންކަމާއެކު ދިރިއުޅުމުގެ ފުރުސަތު ލިބިގެންވާ ބަޔަކަށް ހެދުމެވެ.
މިނިސްޓްރީ އޮފް ސޯޝަލް އެންޑް ފެމިލީ ޑިވެލޮޕްމަންޓުން މައުލޫމާތު ދޭ ގޮތުގައި 1976 ވަނަ އަހަރު ގާއިމުކުރެވުނު ގުރައިދޫ މަރުކަޒުގައި މިހާރު ތިބީ ޖުމްލަ 220 މީހެކެވެ. މީގެތެރޭގައި ހިމެނެނީ 133 ފިރިހެނުންނާއި، 87 އަންހެނުންނެވެ. މި މީހުންގެ ތެރޭގައި އެނދުމަތިވެފައިވާ 15 މީހަކާއި، ނަފްސާނީގޮތުން ބަލި 183 މީހުން ހިމެނެ އެވެ. މަރުކަޒުގައި ތިބި މީހުންގެ ތެރެއިން ފާއިތުވި ހަމަސް ދުވަހުގެ ތެރޭގައި 15 މީހަކުި ވަނީ އަނބުރާ އާއިލާތަކާވެސް ހަވާލުކުރެވިފަ އެވެ.