މި ސަރުކާރު ވެރިކަމަށް އައިއިރު ފެނަކަ ކޯޕަރޭޝަނުން ހިދުމަތްދޭ ރަށްރަށުގެ ތެރެއިން 29 ރަށަކަށް ފެން ފޯރުކޮށްދެނީ ބިލް ނުކޮށްކަން އެ ކުންފުނިން ހާމަކޮށްފި އެވެ.
ފެނަކަ ކޯޕަރޭޝަންގެ ފަރާތުން މިކަން ހާމަކުރެއްވީ އެ ކުންފުނިން މިއަދު ބޭއްވި ނޫސްވެރިންގެ ބައްދަލުވުމުގައި ފެނަކައިގެ މެނޭޖިން ޑިރެކްޓަރު މުހައްމަދު މުއާޒް ރަޝީދު އެވެ.
ކުންފުނީގެ ހިންގުމާ ހަވާލުވެވަޑައިގެންނެވިއިރު ތަފާތު އެކި ސަބަބުތަކާހުރެ ބައެއް ރަށްރަށުގައި ބިލްނުކޮށް ފެން ފޯރުކޮށްދެމުންދިޔަ ކަމަށް އޭނާ ވިދާޅުވި އެވެ.
"އަޅުގަނޑުމެން އައިސް ބަލާލިއިރުގައި 29 ރަށަށް ފެން ފޯރުކޮށްދެނީ ބިލްނުކޮށް. ތަފާތު ސަބަބުތަކަކާހުރެ،" މުއާޒް ވިދާޅުވި އެވެ.
ފެން ފޯރުކޮށްދިނުމަށް ފައިސާ ބޭނުންވާކަން ފާހަގަކުރައްވާ މުއާޒް ވިދާޅުވީ ބިލް ނުކުރުމުން ވަރަށް ބޮޑު ގެއްލުމެއް ކުރިމަތިވެފައިވާ ކަމަށެވެ.
އެ ގޮތުން މުވައްޒަފުންގެ މުސާރައަށް ކުރަންޖެހޭ ހޭދަވެސް ފެން ވިއްކައިގެން ނުލިބޭ ކަމަށް އޭނާ ވިދާޅުވި އެވެ.
މުއާޒް ވިދާޅުވީ ޔުޓިލިޓީ ރެގިއުލޭޝަން އޮތޯރިޓީ (ޔޫއާރްއޭ) އާއެކު ކުރެވުނު މަސައްކަތްތަކުން ލައިސަންސް ނުދޭ ރަށަށް ބިލް ނުކުރެވޭކަން ފާހަގަކުރެވިފައިވާ ކަމަށެވެ.
"ޔޫއާރްއޭގެ ފަރާތުން ކުރި މަސައްކަތްތަކުން އެނގުނީ ލައިސަންސް ނުދޭ ރަށްރަށަށް ބިލް ނުކުރެވޭކަން. ފުރިހަމަ ކުރަންޖެހޭ ކަންތައްތަކާއި ލިޔުންތައް ފުރިހަމަވެފަ ނެތީމަ ލައިސަންސް ނުދެވި މި ހުންނަނީ،" މުއާޒް ވިދާޅުވި އެވެ.
އެ ގޮތުން ބައެއް އަމިއްލަ ކުންފުނިތައް މެދުވެރިކޮށް އާރްއޯ ޕްލާންޓްގެ މަސައްކަތްކޮށް ކޮންޓްރެކްޓަރުގެ ފަރާތުން ލިބެންޖެހޭ ލިޔުންތައް ނުލިބި ޔޫއާރްއޭ އަށް ހުށަނޭޅޭތީ ބިލް ނުކުރެވޭ ކަމަށް މުއާޒް ވިދާޅުވި އެވެ.
"ފެނަކައިން މި ހުރިހާ ހަރަދެއް ބެއާކުރަން ޖެހެނީ. އެތަންތަނަށް ބިލް ނުކުރެވުނަސް ފެން ފޯރުކޮށްދޭން އަޅުގަނޑުމެންނަށް އެބަޖެހޭ. ފެން ފޯރުކޮށްދިނީމަ ބިލް ނުކުރާނަމަ ހައްދެއްނެތް މިންވަރަށް ބޭނުންކުރޭ،" މުއާޒް ވިދާޅުވި އެވެ.