ހައުސިން މިނިސްޓްރީ އުވާލާފައިވާތީ ކުރިން އެ ތަނުގައި މަސައްކަތް ކުރި ކޮންޓްރެކްޓް ބައެއް މުވައްޒަފުންނާ އެކު ދާއިމީ ބައެއް މުވައްޒަފުންވެސް ދޫކޮށްލަންޖެހިދާނެ ކަމަށް ސިވިލް ސާވިސް ކޮމިޝަން (ސީއެސްސީ) އިން އަންގައިފި އެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ ޑިސެމްބަރު 26 ވަނަ ދުވަހު ކެބިނެޓަށް ބަދަލު ގެންނަވާފަ އެވެ. މިބަދަލާ އެކު ހައުސިން މިނިސްޓްރީ އުވާލެއްވުމަށްފަހު އެތަނުގައި ކުރަމުން ދިޔަ ބައެއް މަސައްކަތްތައް ވަނީ އެހެން މިނިސްޓްރީތަކަށް ބަދަލުކުރައްވާފަ އެވެ.
މިބަދަލާ އެކު ހައުސިން މިނިސްޓްރީގެ މުވައްޒަފުން ބަދަލުކޮށްފައިވަނީ ކޮންސްޓްރަކްޝަން އަދި ފިނޭންސް މިނިސްޓްރީގެ ދަށަށެވެ.
ސީއެސްސީ އިން ކުރީގެ ހައުސިން މިނިސްޓްރީގެ މުވައްޒަފުންނަށް ފޮނުވި އީމެއިލްއެއްގައި ބުނެފައިވަނީ ކޮންސްޓްރަކްޝަން މިނިސްޓްރީއާއި ފިނޭންސް މިނިސްޓްރީގެ އިދާރީ އޮނިގަނޑު އަލުން އެކުލަވާލައި އެ އޮނިގަނޑަށް ބޭނުންވާ އަދަދަށް ހައުސިން މިނިސްޓްރީގެ މުވައްޒަފުން ބަދަލުކުރާނެ ކަމަށެވެ.
އޮނިގަނޑުގައިވާ އަދަދަށް ވުރެ ބަދަލުކުރަންޖެހޭ މުވައްޒަފުން އިތުރުވާނަމަ އެ ހާލަތުގައި ބަދަލުކުރާނެ މުވައްޒަފު ކަނޑައަޅާނީ އެސްއީސީގެ އުސޫލުތަކުގެ ތެރެއިން މުވައްޒަފުންގެ ފެންވަރަށް ބެލުމަށްފަހު ކަމަށް ސީއެސްސީ އިން އަންގާފައިވެ އެވެ.
ސީއެސްސީ އިން ބުނީ ކުރީގެ ހައުސިން މިނިސްޓްރީގައި ހިންގަމުން ދިޔަ ކޯޕަރޭޓް ޑިޕާޓްމަންޓުގެ މުވައްޒަފުން ކޮންސްޓްރަކްޝަން އަދި ފިނޭންސަށް ވެސް ބަދަލުނުކުރެވޭނެ ކަމަށެވެ. އެހެންވެ އެހެން މިނިސްޓްރީތަކުން އެ މުވައްޒަފުންނަށް ވަޒީފާއެއް ހަމަޖެއްސޭތޯ ބެލުމަށްފަހު އެކަން ކުރެވޭ ގޮތް ނުވެއްޖެނަމަ އުސޫލުގެ ތެރެއިން އެ މުވައްޒަފުން ވަޒީފާއިން ދޫކޮށްލަންޖެހޭނެ ކަމަށްވެސް އަންގާފައިވެ އެވެ.
ސީއެސްސީ އިން އިތުރަށް ބުނީ ކުރީގެ ހައުސިން މިނިސްޓްރީއާ އެކު ކޮންޓްރެކްޓެއްގެ ދަށުން މަސައްކަތް ކުރަމުން ދިޔަ މުވައްޒަފުންނަށް ސިވިލް ސާވިސް ކޮމިޝަނުގެ ގަވާއިދުގެ 222 ވަނަ މާއްދާގެ ދަށުން ނޯޓިސް ދިނުމަށްފަހު އެ މުވައްޒަފުން ދޫކޮށްލަން ނިންމާފައިވާ ކަމަށެވެ.