ސަރުކާރުގެ ތިން މިނިސްޓްރީއެއް އަނދާ ހުލުވި ހާދިސާ ތަހުގީގު ކުރުމަސް އިންޑިއާގެ ހާއްސަ ޓީމެއް ރާއްޖެ އަތުވެއްޖެ އެވެ.
އިންޑިއާ ހާއްސަ ޓީމު ދިވެހި ފުލުހުންގެ ތަހުގީގު ޓީމާ ގުޅިގެން މިހާރު ވަނީ މަސައްކަތް ފަށާފަ އެވެ.
މިކަމުގެ އިތުރު ތަފްސީލް ފުލުހުންގެ އިދާރާ އަކުން އަދި ހާމައެއް ނުކުރެ އެވެ.
މާލޭގައި މިދިޔަ ހަފްތާގެ ބުރާސްފަތި ދުވަހުގެ ހެނދުނު ސަރުކާރުގެ ރަސްމީ ގަޑި ފެށުމުގެ ކުރިން ގާތްގަނޑަކަށް 6:30 ހާއިރު އަލިފާން ފުރަތަމަ ރޯވީ ޓިނުން ހަދާފައި ހުރި ހައުސިން މިނިސްޓްރީ ގައެވެ. އޭގެފަހުން އަލިފާން ރޯވީ ހައުސިން މިނިސްޓްރީއާއި ޖެހިގެން ހުންނަ ކޮންސްޓްރަކްޝަން މިނިސްޓްރީ ގައެވެ. އަލިފާންގަނޑު އިތުރަށް ފެތުރި އިރުގަނޑެއް ފަހުން ދެން ރޯވީ އެންވަޔަރަންމަންޓް މިނިސްޓްރީ ހިންގަމުން ދިޔަ ގްރީން ބިލްޑިން ގައެވެ.
އަލިފާނުގެ މި ހާދިސާގައި އެ ތަންތަނުގައި ރޯވެ އިމާރާތްތަކާއި އަދި އެ ތަންތަނުގައި ހުރި ލިޔެކިޔުންތަކާއި ވަސީލަތްތައްވެސް ވަނީ ބޭނުން ނުކުރެވޭ ވަރަށް އަނދާފަ އެވެ. އެހެންވެ ވަގުތީގޮތުން އެ ތިން މިނިސްޓްރީ މިހާރު ހިންގަމުން ދަނީ ދަރުބާރުގޭގައެވެ.
އަލިފާނުގެ މިހާދިސާއާ ގުޅޭ އެއްވެސް މައުލޫމާތެއް އެއްވެސް ފަރާތަކަށް ލިބިފައިވާނަމަ ލަސްނުކޮށް އެ މައުލޫމާތު ހިއްސާކުރުމަށް ފުލުހުން ވަނީ އެދިފަ އެވެ.
އަލިފާނުގެ މިހާދިސާގައި ބޮޑު ގެއްލުމެއް ލިބިގެން ދިޔައީ ސިފައިންނާއި ބައެއް އިދާރާތަކުގެ އިހްމާލުން ކަމަށް އިދިކޮޅު އެމްޑީޕީން ވަނީ ތުހުމަތުކޮށްފަ އެވެ.