އަނދާ ހުލިވި ސަރުކާރުގެ ތިން މިނިސްޓްރީ ވަގުތީ ގޮތުން ހިންގުމަށް ދަރުބާރުގެ ހަމަޖައްސައިފި އެވެ.
މާލޭގައި އިއްޔެ ހެނދުނު ސަރުކާރުގެ ރަސްމީ ގަޑި ފެށުމުގެ ކުރިން އަލިފާން ފުރަތަމަ ރޯވީ ހައުސިން މިނިސްޓްރީ ގައެވެ. އޭގެފަހުން އަލިފާން ރޯވީ ހައުސިން މިނިސްޓްރީއާއި ޖެހިގެން ހުންނަ އެންވަޔަރަމަންޓް މިނިސްޓްރީ ގައެވެ. އަލިފާންގަނޑު އިތުރަށް ފެތުރި އިރުގަނޑެއް ފަހުން ރޯވީ އެންވަޔަރަންމަންޓް މިނިސްޓްރީ ގައެވެ.
ސަރުކާރުގެ އޮފިޝަލަކު މިއަދު އަވަސްއަށް ވިދާޅުވީ ތިން މިނިސްޓްރީގެ ހިދުމަތް ވީހާވެސް އަވަހަށް ފެށުމަށްޓަކައި ދަރުބާރުގޭގައި ވަގުތީ ގޮތުން ތިން މިނިސްޓްރީއަށް އޮފީސް ސެޓަޕެއް ތައްޔާރުކުރަމުންދާ ކަމަށެވެ. ނަމަވެސް ހިދުމަތް ފެށޭނެ ދުވަހެއް އޭނާ ވިދާޅުވެފައެއް ނުވެ އެވެ.
"އަޅުގަނޑުމެން މިބަލަނީ ވީހާވެސް އަވަހަށް ހިދުމަތް ފެށޭތޯ،" އޮފިޝަލް ވިދާޅުވި އެވެ.
ދަރުބާރުގޭގައި ތިން މިނިސްޓްރީއަށް އޮފީސް ސެޓަޕެއް ތައްޔާރުކުރުމުގައި އެޗްޑީސީ އިން ގެންދަނީ މުހިއްމު ދައުރެއް އަދާކުރަމުންނެވެ.
ހައުސިން މިނިސްޓްރީގައި އަލިފާން ރޯވެ އަނދާ ހުލިވިއިރު އެތަނުގައި މާލެ ސިޓީ ކައުންސިލްގެ ވައިޓަލް ރެޖިސްޓްރޭޝަންގެ އޮފީސްވެސް ހިންގަމުން ދިޔަ އެވެ. ނަމަވެސް އެ އޮފީހުގެ މަސައްކަތްތައް މިހާރު ވަނީ ހުޅުމާލެއަށް ބަދަލުކޮށްފަ އެވެ.
ދަރުބާރު ގެއަކީ ރާއްޖޭގައި މީގެ 34 އަހަރު ކުރިން ބޭއްވި ސާކް ސަމިޓަށް ހާއްސަކޮށްގެން ރައީސް މައުމޫން އަބްދުލްގައްޔޫމުގެ ވެރިކަމުގައި ހެދި ތަނެކެވެ.
ދަރުބާރުގެ އަކީ ވެސް މިހާރު ވަރަށް ބޮޑަށް ބާވެ ވީރާވެފައިވާ އިމާރާތެކެވެ.