އުރީދޫ ނޭޝަން ގްލޯބަލް ފޭސްއޮފް ކާމިޔާބުކަމާއެކު ނިންމާލައިފި

އުރީދޫ މޯލްޑިވްސްގެ ފުރަތަމަ ބައިނަލްއަގްވާމީ އީސްޕޯޓްސް މުބާރާތް -- އުރީދޫ ނޭޝަން ގްލޯބަލް ފޭސްއޮފް ކާމިޔާބުކަމާއެކު ނިންމާލައިފި އެވެ.

ރާއްޖެ އާއި ގަތަރުގެ ހުނަރުވެރި ގޭމަރުންގެ މެދުގައި ރޮކެޓް ލީގުގެ ވަރުގަދަ ވާދަވެރިކަން ދައްކުވައިދިން މި އިވެންޓް ނިމިގެން ދިޔައީ ހިތްގައިމު ފިނާލޭއަކާއެކު އެވެ. މި މުބާރާތް ކާމިޔާބު ކުރީ ގަތަރުގެ ޓީމުންނެވެ.

މިމަހުގެ އަށަކުން 10 ވަނަ ދުވަހުގެ ނިޔަލަށް ކުރިއަށްދިޔަ އުރީދޫ ނޭޝަން ގްލޯބަލް ފޭސްއޮފްއަކީ އުރީދޫ ނޭޝަން މޯލްޑިވްސް އިން ބައިނަލްއަގްވާމީ އީސްޕޯޓްސް ދާއިރާއަށް ތައާރަފްވި ފުރަތަމަ މަސައްކަތެވެ.

މި މުބާރާތުގައި 1،919 ޑޮލަރުގެ އިނާމު ޕޫލަކާއެކު ކުރިއަށް ގެންގޮސްފައިވާއިރު، މި ސަރަހައްދުގެ ގޭމިން ކޮމިއުނިޓީއަށް މިފަދަ ފުރުސަތުތައް ހޯދައިދިނުމުގައި އަބަދުވެސް އުރީދޫއިންދަނީ މަސައްކަތް ކުރަމުންނެވެ.

ރޮކެޓް ލީގުގެ ފޯމެޓްގައި ދެ ގައުމުގެ ގޭމަރުން ވަނީ ވަރުގަދަ ކުޅުމެއް ދައްކާފަ އެވެ. މުޅި އިވެންޓް އުރީދޫ ނޭޝަން ޔޫޓިއުބް ޗެނަލްއިން ލައިވް ސްޓްރީމްކޮށް، ރާއްޖެ އާއި ގަތަރުގެ ގޭމިން ކޮމިއުނިޓީގެ ތެރޭގައި ހުރި ހުނަރާއި ދައްކުވައިދިނެވެ.

އުރީދޫ މޯލްޑިވްސްގެ ޗީފް އެކްސެކެޓިވް އޮފިސަރު ޚާލިދު އަލް ހަމާދީ ވިދާޅުވީ މި މުބާރާތަކީ މުސްތަގުބަލުގައި ބައިނަލްއަގްވާމީ އީސްޕޯޓްސް މުބާރާތްތައް ބޭއްވުމަށް މަގު ފަހިކޮށްދިން މުބާރާތެއް ކަމަށެވެ. އަދި ޑިޖިޓަލް ކުޅިވަރުތަކުގައި ދުނިޔެއާ ކުރިމަތިލާން ރާއްޖެ އޮތީ ތައްޔާރަށްކަން މި މުބާރާތުން ދައްކުވައިދިން ކަމަށް އޭނާ ވިދާޅުވި އެވެ.

މީގެ އިތުރުން ގޭމް ކުޅޭ ކުޅުންތެރިންނަށް މިފަދަ ޕްލެޓްފޯމެއް ފަހިކޮށްދީ، ރާއްޖެއާއި ގަތަރާ ދެމެދު އިތުރަށް ގުޅުން ބަދަހިކުރެވިގެން ދިއުމަކީ ލިބޭ ވަރަށް ބޮޑު އުފަލެއް ކަމަށްވެސް ހާލިދު ވިދާޅުވި އެވެ.

އުރީދޫ ނޭޝަން ގްލޯބަލް ފޭސްއޮފްގައި ކާމިޔާބީ ހޯދި ބައިވެރިންނާއި ސަޕޯޓަރުންނަށް އުރީދޫ މޯލްޑިވްސް އިން ވަނީ ޝުކުރު އަދާކޮށްފަ އެވެ.

އީސްޕޯޓްސް ކޮމިއުނިޓީއާއެކު އުރީދޫ ނޭޝަން ވަރަށް ގާތުން މަސައްކަތްކުރަމުންދާއިރު މިއަހަރުވެސް އަދި ގިނަ މުބާރާތްތައް ރޭވިފައި ހުރިކަން އުރީދޫ އިން ފާހަގަކުރެ އެވެ.