ރަޝިއާގެ ކުރުސްކް ސަރަހައްދަށް ޔުކްރޭން ސިފައިން ވަދެގަނެ ދިން ހަމާތަކަކީ ކުރެވުނު މޮޔަކަމެއްކަން ޔުކްރޭނުން އަދި ގަބޫލުކުރާނެ ކަމަށް ރަޝިއާއިން ބުނެފި އެވެ.
ކުރުސްކަށް އަރައިގަތުމަކީ ހެދުނު ގޯހެއްކަން ޔުކްރޭނަށް ވިސްނިފައި ނެތް ނަމަ -- ވިސްނޭނީ ކިހިނެއް ހަދައިގެންކަން ރަޝިއާއަށް ވަރަށް ރަނގަޅަށް އެނގޭ ކަމަށް ވެސް މޮސްކޯއިން ވަނީ ބުނެފަ އެވެ.
ޔުކްރޭން ހަނގުރާމަ ފެބުރުއަރީ 2022 ގައި ފަށައިގަތް ފަހުން، ރަޝިއާގެ ސަރަހައްދަކަށް ޔުކްރޭނުން ދިން އެންމެ ވަރުގަދަ ހަމަލާއަކީ އޯގަސްޓް ހައެއްގައި ކުރުސްކަށް ދިން ހަމަލާ ކަމަށް އަސްކަރީ މާހިރުން ބުނެ އެވެ.
ކުރުސްކް ސަރަހައްދުގައި ޔުކްރޭން ސިފައިން ފެތުރިގަތުން ރަޝިއާ ސިފައިން ކޮންޓްރޯލްކޮށްފައި އޮތް ނަމަވެސް، ބައެއް ސަރަހައްދުތައް އަދިވެސް އޮތީ ޔުކްރޭން ސިފައިންގެ ބާރުގެ ދަށުގަ އެވެ.
ކުރުސް ސަރަހައްދުގެ ގަވަރުނަރު ވިދާޅުވި ގޮތުން ޔުކްރޭން ސިފައިނާއި އާންމުންނާ ދެމެދުވެސް ހަމަނުޖެހުތަކެއް ވަނީ ހިނގާފަ އެވެ. އަދި އާންމުންގެ ތެރެއިން 12 މީހަކު މަރުވެ 121 މީހަކަށް ވަނީ ބޮޑެތި ގެއްލުންތަކެއްވެސް ލިބިފަ އެވެ.
ރަޝިއާ ސިފައިން މި ސަރަހައްދު ހިފަން މަގުތަނަވަސްކުރުމަށް އެ ސަރަހައްދުން އާންމުން ބާލަން ޖެހޭ ކަމަށްވެސް ގަވަރުނަރު ވިދާޅުވި އެވެ. މި ގޮތުން 120،000 -- އެއްލައްކަ ވިހި ހާހެއްހާ މީހުން ރައްކާތެރި ތަންތަނަށް ގެންދަން ޖެހޭ ކަމަށްވެސް އޭނާ ވިދާޅުވި އެވެ.
އދ.ގެ ރަޝިއާ ވަފުދުގެ ފަރާތުން ދިމިތުރީ ޕޮލިޔަންސްކީ ވިދާޅުވި ގޮތުން ޔުކްރޭނަށް އަދިވެސް އެއްޗެއް ނުވިސްނެ އެވެ.
ޔުކްރޭންގެ އަސްކަރިއްޔާގައި ސިފައިން އެހާ މަދުއިރު، ކުރުސްގައި ތިބި ސިފައިންނަށް އެނބުރި ގައުމަށް ދެވޭނެކަން ނޭނގޭ ކަމަށްވެސް އޭނާ ވިދާޅުވި އެވެ.
ހަނގުރާމައިން ސަލާމަތްވުމަށް ރަޝިއާއިން ހެޔޮ ގޮތްތައް ޔުކްރޭނަށް ހުށަހަޅާފައި އޮތްއިރު އެއިން އެއްވެސް ކަމެއް ބަލައިނުގަނެ، ހަނގުރާމަކުރަން ދިމާކުރުމުން ބޮޑެތި ގެއްލުންތައް ލިބޭނެ ކަމަށް އޭނާ ވިދާޅުވި އެވެ.
އޭނާ އަދި ވިދާޅުވީ ޔުކްރޭނަށް މިފަހަރު ދިލަ ނުކެނޑޭ ވަރުގެ ހަމަލާތަކެއް ދެއްވާނެ ކަމަށެވެ.