ރަޝިއާގެ ރައީސް ލަޑިމިއާ ޕޫޓިންއާ މަޝްވަރާކުރައްވަން އެދިވަޑައިގަންނަވާ ކަމަށް އެމެރިކާގެ އިންތިޚާބީ ރައީސް، ޑޮނަލްޑް ޓްރަމްޕް ވިދާޅުވެއްޖެ އެވެ.
އެމެރިކާގައި ނޮވެމްބަރު ފަހެއްގައި އޮތް ރިޔާސީ އިންތިޚާބު ކާމިޔާބުކުރެއްވުމަށް ފަހު ޕޫޓިންއާ މަޝްވަރާކުރެއްވިންތޯ ނޫސްވެރިއަކު ދެންނެވުމުން، ސުވާލަށް ޖަވާބުދެއްވަން ޓްރަމްޕް ދެކޮޅުހެއްދެވި އެވެ.
މި ސުވާލަށް ސީދާ ޖަވާބެއް ދެއްވުމުގެ ބަދަލުގައި ޓްރަމްޕް ވިދާޅުވީ ތިޔައީ ކުރަންޖެހިވަޑައިގެންފައި އޮތް ކަމެއް ކަމަށެވެ.
ޓްރަމްޕްގެ ފްރޮރިޑާ ގަނޑުވަރު، މާރަލާގޯގައި އޮތް ނޫސްވެރިންގެ ބައްދަލުވުމެއްގައި ވާހަކަދައްކަވަމުން ޓްރަމްޕް ވިދާޅުވީ، ރަޝީއާ އާއި ޔުކްރޭން ސުލްހަކުރުމަށްޓަކައި، ރައީސް ލަޑިމިއާ ޕޫޓިން އަދި ރައީސް ޒެލެންސްކީއާ މަޝްވަރާކުރައްވާނެ ކަމަށެވެ.
ޔުކްރޭން ހަނގުރާމަ ހުއްޓުވަން ޖެހޭ ކަމަށް ވިދާޅުވެ ޓްރަމްޕް ވިދާޅުވީ، ރަޝިއާގެ ވަފުދުތަކާއި ޔުކްރޭންގެ ވަފުދުތައް އެއްމޭޒު ދޮށަށް ޖަމާކުރަންޖެހޭ ކަމަށެވެ. އަދި އެއީ ހުއްޓުވަން ޖެހިފައި އޮތް ހަނގުރާމައެއް ކަމަށްވެސް ވިދާޅުވި އެވެ.
ދެވަނަ ބޮޑު ހަނގުރާމަ ހުއްޓުވާލީ ތަލާފޮޅުން ބޮޑު ކަމުން ކަމަށް ޓްރަމްޕް ވިދާޅުވި އެވެ. އެއަށް ފަހު އަނެއްކާވެސް ތަޅާފޮޅުން މިއޮތީ އިތުރުވެފައި ކަމަށް ޓްރަމްޕް ވިދާޅުވި އެވެ.
ރިޔާސީ އިންތީޚާބަށް ކެމްޕޭންކުރެއްވި އިރުވެސް ޓްރަމްޕް ވަނީ ޔުކްރޭން ހަނގުރާމަ ހުއްޓުވާނެ ކަމަށް ވައުދުވެވަޑައިގެންފަ އެވެ. އެއަށް ފަހު އިންތިޚާބު ކާމިޔާބުކުރެއްވުމަށް ފަހުވެސް ޓްރަމްޕް ވިދާޅުވަނީ ހަމަ އެއް ވާހަކަ އެވެ.
ޓްރަމްޕް ވިދާޅުވީ ޔުކްރޭން ހަނގުރާމަ ހުއްޓުވަށް އޭނާއަށް ކުރެއްވުން ހުރި ހުރިހާ ކަމެއް ކުރައްވާނެ ކަމަށެވެ.
މީޑިއާ ރިޕޯޓްތައް ބުނާ ގޮތުން ޑޮނަލްޑް ޓްރަމްޕް އަކީ ރަޝިއާގެ ރައީސް ލަޑިމިއާ ޕޫޓިންގެ އަރިސް ބޭފުޅެކެވެ. ވެރިކަމުގެ ދުވަސްވަރު އަދި މިހާރުވެސް މި ދެ ލީޑަރުން މަޝްވަރާކުރައްވާ ކަމަށް ޚަބަރުތައް ބުނެ އެވެ.
ޓްރަމްޕް އާއި ޕޫޓިންއާ ދެމެދު އޮންނަ ގުޅުމާ ބެހޭ ގޮތުން ވާހަކަދެއްކުމަކީ ޓްރަމްޕް ވެސް ކުރައްވާ ކަމެއް ނޫނެވެ. އަދި ރަޝިއާގެ ރިޔާސީ ގަނޑުވަރުން ވެސް މި ކަމާ ވާހަކަދައްކާކަށް ބޭނުމެއް ނުވެ އެވެ.