ބަންގްލަދޭޝް މަސައްކަތްތެރިން ރާއްޖެއަށް ގެންނަން އާންމުކޮށް ހުއްދަ ދޭނީ ގަވައިދާ ހިލާފަށް އުޅޭ ބިދޭސީންގެ މައްސަލަތައް ހައްލުކުރުމަށް ސަރުކާރުން ކުރަމުންދާ މަސައްކަތްތަކާ އެކު ހައްލުތަކެއް ހޯދުމުން ކަމަށް ހޯމް ލޭންޑް މިނިސްޓަރު އަލީ އިހްސާން ވިދާޅުވެއްޖެ އެވެ.
ބަންގްލަދޭޝް މަސައްކަތްތެރިން ރާއްޖެ ގެނައުން މަނާ ކުރީ ކޮވިޑް 19ގެ ދުވަސްވަރު ރައީސް އިބްރާހީމް މުހައްމަދު ސޯލިހްގެ ވެރިކަމުގައި މީގެ ހަތަރު އަހަރެއް ކުރިންނެވެ. ނަމަވެސް ރައީސް ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގަތުމަށްފަހު ހާއްސަ ހުއްދައެއްގެ ދަށުން މިދިޔަ ޑިސެމްބަރުގެ ތެރޭގައި ވަނީ ބަންގްލަދޭޝް މަސައްކަތްތެރިން ރާއްޖެއަށް ގެނައުމަށް ހުއްދަ ދީފަ އެވެ. އެކަމަކު މިއީ އާންމުކޮށް ހުޅުވާލައިގެން ދޭ ހުއްދައެއް ނޫނެވެ. އެހެންްވެ މިއީ ބިދޭސީ މަސައްކަތްތެެރިން ބޭނުންވާ ކުންފުނިތަކުގެ ވަރަށް ބޮޑު ޝަކުވާ އެކެވެ.
ރާއްޖެއަށް ބިދޭސީން ގެންނަ ކުންފުނިތަކާ އެކު މިއަދު ބޭއްވި ބައްދަލުކުރެއްވުމުގައި ހޯމްލޭންޑް ސެކިއުރިޓީ މިނިސްޓަރު އިހްސާން ވިދާޅުވީ ގަވައިދާ ހިލާފަށް އުޅޭ ބިދޭސީން އަލުން ގަވައިދުގެ ތެރެއަށް ވެއްދުމާއި، ބިދޭސީންގެ ދަފްތަރެއް އަލުން އެކުލަވާލުން ފަދަ މަސައްކަތްތަކެއް ކުރިއަށްދާތީ މިކަން ހައްލު ނުވަނީސް ބިދޭސީން ރާއްޖެ ގެނައުމުގެ އާންމު ހުއްދައެއް ނުދެވޭނެ ކަމަށެވެ.
މިނިސްޓަރު ވިދާޅުވީ ބިދޭސީން ރާއްޖެ ގެންނަ ބައެއް ކުންފުނިތަކުން ބިދޭސީން ގެނައުމަށްފަހު ދައުލަތަށް ދައްކަންޖެހޭ ފީތައް ގަވައިދުން ދައްކަމުން ނުދާތީއާއި ބިދޭސީންނަށް މުސާރަ ނުދޭތީ ރާއްޖެ ގެންނަ ބިދޭސީ މީހާ ގަވައިދާ ހިލާފުވުމުން އެކަމުގެ ޒިންމާ ބިދޭސީ މީހާ ގެންނަ ކުންފުނިންވެސް ނަގަންޖެހޭނެ ކަމަށެވެ.
ބިދޭސީންގެ ފި ގަވައިދުން ނުދައްކާ ކުންފުނިތަކުގެ ލިސްޓް ހާމަކުރުމާ އެކު ބައެއް ކުންުފުނިތަކުން ފައިސާ ދެއްކި ނަމަވެސް ލިސްޓްގައި ހިމެނޭ ވަރަށް ގިނަ ކުންފުނިތައް އަދިވެސް ފައިސާ ނުދައްކާ ހުރިކަންވެސް މިނިސްޓަރު ފާހަގަކުރެއްވި އެވެ.
"އަދިވެސް ވަރަށް ބޮޑެތި އަދަދުތަކުން ފައިސާ ނުދައްކާ ކުންފުނިތައް ގިނަ،" އިހްސާން ވިދާޅުވި އެވެ.
މިނިސްޓަރު އިހްސާން މީގެކުރިންވެސް ވިދާޅުވި ފަދައިން މިއަދުވެސް ވިދާޅުވީ ގާނޫނާއި ގަވައިދާ ހިލާފަށް ރާއްޖޭގައި އުޅޭ ބިދޭސީންގެ މައްސަލަ ގިނަ ވެގެން ތިން އަހަރުގެ ތެރޭގައި ހައްލުކުރައްވާނެ ކަމަށެވެ. މިހާރު ކުރަމުންދާ މަސައްކަތަކީ ރާއްޖޭގައި ބިދޭސީ މަސައްކަތްތެރިންގެ ގޮތުގައި އުޅޭ މީހުން ދެނެގަތުން ކަމަށްވެސް ވިދާޅުވި އެވެ.
އިހްސާން ވިދާޅުވީ ރާއްޖޭގައި އުޅޭ ބިދޭސީ މަސައްކަތްތެރިން ދެނެގަތުމަށްފަހު ގަވައިދާ ހިލާފަށް އުޅޭ މީހުންނާ މެދު ދެގޮތަކަށް އަމަލުކުރާނެ ކަމަށެވެ. އެގޮތުން މާބޮޑެތި މައްސަލަތަކެއް ނެތް މީހުން ގަވައިދުގެ ތެރެއަށް ވަންނަން ބޭނުންވާނަމަ އެ ފުރުސަތު ދޭނެ ކަމަށާއި އަދި އަނެއް ގޮތަކީ އެ މީހުން ރާއްޖެ ދޫކޮށް ދާން ބޭނުންވާނަމަ އެ ފުރުސަތު ދިނުން ކަމަށެވެ.
ހޯމްލޭންޑް ސެކިއުރިޓީގައި ހުރި ތަފާސްހިސާބުތަކަށް ބަލާއިރު ރާއްޖޭގައި ބަންގްލަދޭޝް މަސައްކަތްތެރިންގެ ގޮތުގައި 90،624 މީހަކު ރާއްޖޭގައި އެބައުޅެ އެވެ. އަދި ރާއްޖޭގައި އުޅޭ ޖުމްލަ ބިދޭސީ މަަސައްކަތްތެރިންގެ ތެރެއިން ގަވައިދާ އެއްގޮތަށް ބަރާބަރަށް ފައިސާ ދައްކަނީ 36 ޕަސެންޓް މީހުންނަށް ކަމަށްވެސް ހޯމްލޭންޑް ސެކިއުރިޓީ މިނިސްޓްރީން ބުނެ އެވެ.