ރާއްޖޭގައި ގަވާއިދާ ހިލާފަށް އުޅޭ ބިދޭސީންގެ މައްސަލަ ހައްލުކުރުމަށް ފަށާފައިވާ "ކުރަނގި" އޮޕަރޭޝަންގެ ދަށުން 10،000 އަށް ވުރެ ގިނަ ބިދޭސީންގެ ބަޔޯޑާޓާ އެއްކުރެވިފައިވާ ކަމަށް ހޯމްލޭންޑް ސެކިއުރިޓީ މިނިސްޓަރު އަލީ އިހްސާނު ވިދާޅުވެއްޖެ އެވެ.
ހަފްތާ 52ގެ ނަމުގައި ދައުލަތުގެ މީޑިއާ އިން ރޭ ގެނައި ހާއްސަ ޕެނަލް ޑިސްކަޝަންއެއްގައި ވާހަކަ ދައްކަވަމުން އިހްސާން ވިދާޅުވީ ގަވާއިދާއި ހިލާފަށް އުޅޭ ބިދޭސީންގެ މައްސަލައަކީ މުޅިރާއްޖެއަށް ދިމާވެފައިވާ ސީރިއަސް މައްސަލައެއް ކަމަށެވެ.
އިހްސާން ވިދާޅުވީ ބިދޭސީން މައްސަލައަށް އަންނަ އަހަރުގެ އޭޕްރީލް މަހުގެ ނިޔަލަށް ހައްލެއް ހޯދުމަށް ފުރަތަމަ މަރުހަލާގައި މަސައްކަތްތަކެއް ކުރަމުންދާ ކަމަށެވެ. މައްސަލައަށް ހައްލު ހޯދުމަށް ކުރިއަށް ގެންދާ "ކުރަނގި" އޮޕަރޭޝަން މިހާރުވެސް 138 ރަށެއްގައި ކުރިއަށްދާ ކަމަށްވެސް ވިދާޅުވި އެވެ. އ
"މި އޮޕަރޭޝަންގައި މިހާތަނަށް 10،000އަށް ވުރެ ގިނަ ބިދޭސީންގެ ބަޔޯމެޓްރިކްސް އެއްކުރެވިއްޖެ،" އިހްސާން ވިދާޅުވި އެވެ.
މިނިސްޓަރު ވިދާޅުވީ ގަވާއިދާ ހިލާފަށް ރާއްޖޭގައި އުޅެމުން ދިޔަ 5،000 އެއްހާ ބިދޭސީން މިސަރުކާރުގައި ރާއްޖެއިން ފޮނުވާލެވިއްޖެ ކަމަށެވެ. އަދި ގަވާއިދާ ހިލާފަށް އުޅެމުން ދިޔަ މީހުން ހޯދުމަށްފަހު 48 ގަޑިއިރު ތެރޭ ފުރުވާލުމުގެ އިންތިޒާމު ހަމަޖައްސާފައިވާ ކަމަށްވެސް އިހްސާން ވިދާޅުވި އެވެ.
"އަޅުގަނޑުމެންގެ އަމާޒެއް އަންނަ އަހަރުގެ އޭޕްރީލްއާއި ހަމައަށް މިމަސައްކަތް ނިންމުން. އަޅުގަނޑުމެން ވާނީ ރާއްޖޭގައި ކުދި ވިޔަފާރިތަކަށް ހުރަސްތަކެއް އަޅަމުންދިޔަ ބިދޭސީންގެ ވިޔަފާރިތައް ހުއްޓުވާ އެފަދަ ވިޔަފާރިތަކުގައި ގަވާއިދާ ހިލާފަށް އުޅެމުންދިޔަ ބިދޭސީން 48 ގަޑިއިރުގެ ތެރޭގައި ފުރުވާލުމުގެ އިންތިޒާމު ހަމަޖައްސާފައި،" އިހްސާން ވިދާޅުވި އެވެ.
ގަވާއިދާ ހިލާފަށް އުޅޭ ބިދޭސީންގެ މައްސަލް ހައްލުކުރުމަށް ފާއިތުވި އެއް އަހަރު ގިނަ މަސައްކަތްތަކެއް ކުރެފިފައިވާ ކަމަށްވެސް އިހްސާން ވިދާޅުވި އެވެ.