ރާއްޖޭގައި ގަވައިދާ ހިލާފަށް އުޅޭ ބިދޭސީން ހޯދުމަށް މޯލްޑިވްސް އިމިގްރޭޝަނުން ކުރިއަށް ގެންދާ އޮޕަރޭޝަންގައި 23 ބިދޭސީއަކު އަތުލައިގެންފި އެވެ.
މިއަދު ފަތިހުން ފެށިގެން މެންދުރާ ހަމައަށް މި އޮޕަރޭޝަން ކުރިއަށް ގެންދިޔައީ ލޯކަލް މާރުކޭޓް ސަރަހައްދުގައެވެ.
ގަވައިދާ ހިލާފަށް އުޅޭ ބިދޭސީންގެ މައްސަލަތައް ރިޕޯޓް ކުރުމަށް ހަދާފައިވާ "އިމިގްރޭޝަން ވޮޗް"އަށް ލިބިފައިވާ މައުލޫމާތަކާ ގުޅިގެން ކުރިއަށް ގެންދިޔަ މި އޮޕަރޭޝަންގައި ވަނީ މާރުކޭޓް ސަރަހައްދު އަޅާފައިވާ އުޅަނދުފަހަރާއި، ލަފާ ފުރާ އުޅަނދުތަކުގައި އުޅޭ ބިދޭސީންވެސް ބަލައި ފާސްކޮށްފަ އެވެ.
ޖުމްލަ 148 ބިދޭސީން ބަލައި ފާސްކޮށް، ގަވާއިދާ ހިލާފަށް އުޅޭ ބިދޭސީ 22 ފިރިހެނަކާއި 01 އަންހެނަކު އެ ސަރަހައްދުން ހައްޔަރުކުރި އެވެ.
ރައީސް ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގެންނެވި ފަހުން މިސަރުކާރަށް އެއް އަހަރުވީއިރު 5،000 އަށް ވުރެ ގިނަ ބިދޭސީން ވަނީ ޑިޕޯޓްކޮށްފަ އެވެ.
ރާއްޖޭގައި ގަވައިދާ ހިލާފަށް އުޅޭ ބިދޭސީންގެ މައްސަލަ ކުރިއަށް އޮތް ތިން އަހަރުގެ ތެރޭގައި ހައްލު ކުރާނެ ކަމަށް ސަރުކާރުން ގެންދަނީ ތަކުރާރުކޮށް ބުނަމުންނެވެ.