ރާއްޖޭގައި ގަވާއިދާ ހިލާފަށް އުޅޭ ބިދޭސީންގެ މައްސަލަ ހައްލުކުރުމަށް ފަށާފައިވާ "ކުރަނގި" އޮޕަރޭޝަންގެ ދަށުން މިހާތަނަށް 18،000 އަށް ވުރެ ގިނަ ބިދޭސީންގެ ބަޔޯމެޓްރިކް ޑޭޓާ އެއްކޮށްފި އެވެ.
ކުރަނގި އޮޕަރޭޝަން ފެށީ ކ. ހިންމަފުށީގައި މިއަހަރުގެ މެއި މަހުގެ ދެވަނަ ދުވަހު އެވެ.
ކުރަނގި އޮޕަރޭޝަންގެ ދަށުން ބިދޭސީންގެ މައުލޫމާތު އެއްކުރުމުގެ މަސައްކަތް 194 ރަށެއްގައި ކުރިއަށްދާއިރު މި 50 ރަށެއްގައި މި މަސައްކަތް އެއްކޮށް ނިންމާފައިވާ ކަމަށްވެ އެވެ.
އޮޕަރޭޝަން ކުރަނގީގެ މަގުސަދަކީ ރާއްޖޭގައި ގަވާއިދާ ހިލާފަށް އުޅޭ ބިދޭސީންގެ މައްސަލައަށް ދާއިމީ ހައްލެއް ހޯދުމެވެ.
މި އޮޕަރޭޝަނަށް ބޭނުންވާ މައުލޫމާތު އެއްކުރަނީ ކައުންސިލް އިދާރާތަކުގައި ބިދޭސީންގެ ބަޔޯ މެޓްރިކްސް ނެގުމުގެ އިންތިޒާމު ގާއިމުކޮށްގެންނެވެ. މިމައުލޫމާތުގެ ބޭނުންކޮށްގެން ބިދޭސީންގެ މައި ދަފްތަރެއް އެކުލަވާލުމަށްވެސް ހަމަޖެހިފައިވެ އެވެ.
ރާއްޖޭގައި ގަވައިދާ ހިލާފަށް އުޅޭ ބިދޭސީންގެ މައްސަލަ ހައްލުކުރުމަށް މޯލްޑިވްސް އިމިގްރޭޝަނުން ކުރަމުންދާ މަސައްކަތްތަކުގެ ދަށުން މިހާރު ވަނީ ގަވައިދާ ހިލާފަށް އުޅުނު 5،000 އަށް ވުރެ ގިނަ ބިދޭސީން ރާއްޖެއިން ފޮނުވާލާފަ އެވެ.