ރާއްޖޭގައި ބިދޭސީން ވަޒީފާ އަދާކުރާ ތަންތަނުން ދައުލަތަށް ދައްކަންޖެހޭ ރުފިޔާގެ ތެރެއިން އެއް ބިލިއަނަށް ވުރެ ގިނަ ރުފިޔާ ހޯދާފައިވާކަމަށް ހޯމްލޭންޑް ސެކިއުރިޓީ މިނިސްޓަރު އަލީ އިހުސާން ވިދާޅުވެއްޖެ އެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން މިނިސްޓަރު ވިދާޅުވީ ރާއްޖޭގައި ބިދޭސީންނަށް ވަޒީފާދޭ ފަރާތްތަކުން ފީއާއި ޖޫރިމަނާގެ ގޮތުން ދައުލަތަށް ދައްކަންޖެހޭ 1.7 ބިލިއަން ރުފިޔާގެ ތެރެއިން އެއް ބިލިއަން ރުފިޔާ ހޯދާފައިވާ ކަމަށެވެ.
"މިހާރު ނުލިބި ހުރީ 703 މިލިއަން ރުފިޔާ" މިނިސްޓަރު ވިދާޅުވި އެވެ.
މިނިސްޓަރު ވިދާޅުވީ ގަވާއިދާ ހިލާފަށް އުޅޭ ބިދޭސީންގެ މައްސަލަ ހައްލުކުރުމަށް ކުރެވޭ މަސައްކަތް ބާރަށް ކުރިއަށްދާ ކަމަށެވެ.
އެގޮތުން އެފަދަ ބިދޭސީން ހޯދުމަށް ހޯމްލޭންޑް ސެކިއުރިޓީ މިނިސްޓްރީއާއި ގުޅުންހުރި އިދާރާތަކުން ގުޅިގެން ކުރިއަށް ގެންދާ "އޮޕަރޭޝަން ކުރަނގި" ޖޫން މަހުގެ ތިންވަނަ ދުވަހު ފެށި ފަހުން މިހާތަނަށް 6891 ބިދޭސީންގެ ބަޔޯމެޓްރިކް ޑޭޓާ އެއްކޮށްފައިވާ ކަމަށް މިނިސްޓަރު ވިދާޅުވި އެވެ. އޭގެ ތެރޭގައި ރާއްޖޭގެ 82 ރަށެއްގައި އުޅޭ ބިދޭސީން ހިމެނެއެވެ.
މިނިސްޓަރު އިހުސާން ވިދާޅުވީ އެއް އަހަރުގެ ތެރޭގައި ހުރިހާ ބިދޭސީންގެ ބަޔޯމެޓްރިކް ޑޭޓާ ނެގުމަށް އަމާޒުކުރާ ކަމަށެވެ. އަދި މިހާރު ކުރިއަށް ދާ ދުވެލީގައި ދާނަމަ އަންނަ އަހަރުގެ ޖެނުއަރީ މަހުގެ ނިޔަލަށް އެ މަސައްކަތް ނިމޭނެ ކަމަށް ވިދާޅުވި އެވެ.
އޭގެ އިތުރުން އެ އޮޕަރޭޝަން މާލެ ސަރަހައްދަށް ވެސް ފުޅާކުރާނެ ކަމަށާއި ނޮވެމްބަރު މަހުގެ އެއްވަނަ ދުވަހު މާލޭގައި އެ މަސައްކަތް ކުރަން ފަށާނެ ކަމަށް ވެސް މިނިސްޓަރު ވިދާޅުވި އެވެ.
މިނިސްޓަރު ވިދާޅުވީ އެ އޮޕަރޭޝަނުގައި 150 އަށްވުރެ ގިނަ މުވައްޒަފުން ބައިވެރިވާނެ ކަމަށާއި ސަރުކާރުގެ އެސްއޯއީތަކުގެ އެއްބާރުލުން ވެސް ލިބޭނެ ކަމަށެވެ.