މިނިވަން ފަންސާހާއި ގުޅިގެން އެއް މިލިއަން ރުފިޔާ ހަރަދުކޮށްގެން ސަރުކާރުން ބަން ނަމޫނާ "ކަޅުއޮއްފުންމި" އާއި ސަލްޓަން ޕާކުގައި ހެދި ލެޑް ލައިޓް ގާޑަން ބަދަލުތަކާ އެކު އަލިކިލެފާނު މަގުގައި ހުންނަ ސިޓީ ޕާކަށް ބަދަލުކޮށް އަންނަ ޖޫން މަސް ތެރޭގައި ހުޅުވާނެ ކަމަށް ހޯމް މިނިސްޓްރީން ބުނެފި އެވެ.
ހޯމް މިނިސްޓްރީގެ ޑެޕިއުޓީ މިނިސްޓަރު މުހައްމަދު ސަލީމް (މާޒް ސަލީމް) އަވަސް އަށް މިއަދު ވިދާޅުވީ، ކަޅުއޮއްފުންމި ސިޓީ ޕާކަށް ބަދަލުކުރަން މިހާރު ނިންމައި އެކަމަށް ބޭނުންވާ ބައެއް މަސައްކަތް ފަށާފައިވާ ކަމަށެވެ.
ތާރީހީ ތަރިކައެއްގެ ގޮތުގައި އާންމުންނަށް ފެންނަ ގޮތަށް ބާއްވަން ބަން ކަޅުއޮއްފުންމި މާލެ ގެނައީ މިދިޔަ ޑިސެމްބަރު މަހުއެވެ. އޮޑި މާލެ ގެނެސް ދާރުލްއާސާރުގައި ބާއްވަން ކުރިން ނިންމި ނަމަވެސް، ދާރުލްއާސާރުގައި އޮޑި ބޭއްވޭނެ ޖާގަ ނެތުމުން ހޯމް މިނިސްޓްރީން ނިންމީ އޮޑި ހުޅުމާލެ ހެރިޓޭޖް އައިލެންޑަށް ބަދަލުކުރުމަށެވެ. އަދި އެހާތަނަށް ކަޅުއޮއްފުންމި ފޭދޫ ފިނޮޅުގައި ބޭއްވުމަށެވެ. ނަމަވެސް މިހާރު އަނެއްކާވެސް ކަޅުއޮއްފުންމި މާލެ ގެނެސް ސިޓީ ޕާކުގައި ބާޢްވަން އެ މިނިސްޓްރީޏް ވަނީ ނިންމާފަ އެވެ.
ސަލީމް ވިދާޅުވީ، ކަޅުއޮއްފުންމި ސިޓީ ޕާކަށް ބަދަލުކުރަން ނިންމީ ހުޅުމާލެ ހެރިޓޭޖް އައިލެންޑް މުޅިން ނިމެން އަދިވެސް ވަރަށް ގިނަ ދުވަސް ނަގާނެތީ، އެހާ ދުވަހު އޮޑި އާންމުންނާއި ދުރުގައި ބާއްވަން ބޭނުން ނުވާތީ ކަމަށެވެ. އެހެންކަމުން ކުރިއަށް އޮތް ދެ މަސް ދުވަހުގެ ތެރޭގައި ސިޓީ ޕާކު ރީތި ކުރުމަށްފަހު ކަޅުއޮއްފުންމި އެތަނަށް ބަދަލުކޮށް ޕާކް ހުޅުވާލާނެ ކަމަށެވެ.
"ކަޅުއޮއްފުންމި ސިޓީ ޕާކަށް ބަދަލުކުރާ ގޮތަށް ނިންމީ އާންމުންނަށް ފެންނަ ގޮތަށް ވީހާވެސް އަވަހަށް އޮޑި ބާއްވާނެ ގޮތެއް ހޯދުމަށް. ސިޓީ ޕާކުގައި އޮޑި ބާއްވާނީ ރީއްޗަށް ތަނެއް ހަދާފަ. އެތަނަށް އާންމުންނަށް ޒިޔާރަތްކުރެވޭނެ. ފޮޓޯވެސް ނެގޭނެ،" ސަލީމް ވިދާޅޫވި އެވެ.
ސަލީމް ވިދާޅުވީ ކަޅުއޮއްފުންމި އާއެކު ސިޓީ ޕާކަށް ދެން އަންނާނެ އެންމެ ބޮޑު ތަފާތަކީ އެތަނަށް ސަލްޓަންޕާކުގައި ހުރި ލެޑް ގާޑަން ބަދަލުކުރުން ކަމަށެވެ. އެ ދެ މަސައްކަތް ވެސް އެކު އެކީގައި ނިންމާލުމަށް މަސައްކަތް ކުރާ ކަމަށެވެ.
"ސަލްޓަން ޕާކު ގައި މިހާރު ހަދާފައި އެހުރި ލެޑް ގާޑަން އަޅުގަނޑުމެން މިވަނީ ސިޓީ ޕާކަށް ބަދަލުކުރަން ނިންމާފައި، އެގޮތަށް ނިންމާފައިވަނީ އެޕާކު ތަރައްގީކޮށް، ސަލްޓަންޕާކަށް ވެސް ބަދަލުތަކެއް ގެނައުމުގެ ގޮތުން،" ސަލީމް ވިދާޅުވި އެވެ.