މާލޭގައި އެޅުމަށް ހަމަޖެހިފައިވާ ދެވަނަ ވަގުފް އިމާރާތް -- ދާރުލް އަރުޤަމްގެ ކުރެހުން ތައްޔާރުކޮށްދޭނެ ފަރާތެއް ހޯދަން އިސްލާމިކް މިނިސްޓްރީން ހުޅުވާލައިފި އެވެ.
އިސްލާމިކް މިނިސްޓްރީން އޮފީސް އިމާރާތެއްގެ ގޮތުގައި މި އިމާރާތް އެޅުމަށް ހަމަޖެހިފައިވަނީ މާލޭގެ 64 ނަންބަރު ކޮށީގައެވެ.
މިނިސްޓްރީން މިއަދު އިއުލާންކޮށްފައިވަނީ ދާރުލް އަރުޤަމްގެ ކޮންސެޕްޓް ޑިޒައިން، ޑްރޯވިންގްސް، ބީއޯކިޔުއާއި، ޓެކްނިކަލް ސްޕެސިފިކޭޝަން، މެޓީރިއަލް ސްޕެސިފިކޭޝަން އަދި ޓެންޑަ ޑޮކިއުމެންޓް ތައްޔާރުކޮށްދޭނެ ފަރާތެއް ހޯދާށެވެ.
މި ބީލަން ހުޅުވާލާފައިވަނީ ވިޔަފާރި ރަޖިސްޓްރީ ކުރުމުގެ ގާނޫނުގެ ދަށުން ވިޔަފާރި ރަޖިސްޓަރީ ކޮށްފައިވާ ކުދި އަދި މެދު ފަންތީގެ ވިޔަފާރިތަކަށެވެ.
މިމަޝްރޫއަށް ބީލަން ހުށަހެޅުމަށް ފުރުސަތު ދިނުމަށް ހަމަޖެހިފައިވަނީ މިމަހުގެ 14 ވަނަ ދުވަހުގެ މެންދުރުފަހު 2:00ގެ ކުރިން ރަޖިސްޓަރީ ކުރާ ފަރާތްތަކަށެވެ.
ބީލަން ހުށަހެޅުމަށް ހަމަޖެހިފައިވަނީ މިމަހުގެ 20 ވަނަ ދުވަހުގެ ހެނދުނު 11:00ގެ ކުރިންނެވެ.
ވަގުފް އިމާރާތެއްގެ ގޮތުގައި މިވަގުތު ރާއްޖޭގައި ހުރި ހަމައެކަނި އިމާރާތަކީވެސް މާލޭގައި ހުރި އިމާރާތެކެވެ. އެއީ މަޖިީދީ މަގުގައި މާފަންނު މަދަރުސާ އާއި އިންވެގެން ހުރި "ދާރުލް އީމާން" އިމާރާތެވެ.
ރާއްޖޭގައި ބިނާކުރާ އެންމެ ބޮޑު ވަގުފް އިމާރާތް "ދާރުއްސަލާމް"ގެ ނަމުގައި ހުޅުމާލޭގައި އިމާރާތް ކުރުމަށްވެސް އިސްލާމިކް މިނިސްޓްރީން ވަނީ ނިންމާފަ އެވެ.
ރާއްޖޭގެ އެކި ސަރަހައްދުތަކުގައި ވަގުފް އިމާރާތްތަކެއް އެޅުމަށްޓަކައި ސިޓީ ވަގުފާއި އަތޮޅު ވަގުފް މަޝްރޫއެއްވެސް މިހާރު ވަނީ އިފްތިތާހްކޮށްފަ އެވެ.