ސައުދީ އަރަބިއްޔާގެ ރަސްގެފާނު ސަލްމާން ބިން އަބްދުލްއަޒީޒު އަލް-ސުއޫދު އަނެއްކާވެސް ފުއްޕާމޭގެ އާލާސްކަންފުޅަކަށް ފަރުވާ ހޯއްދަވަމުން ގެންދަވާ ކަމަށް އެ ގައުމުގެ ޝާހީ ގަނޑުވަރުން ބުނެފި އެވެ.
އުމުރުފުޅުން 88 އަހަރުގެ ރަސްގެފާނުގެ ސިއްހީ ހާލަތާ ގުޅޭ ޓެސްޓުތަކެއް އޮކްޓޫބަރު 6 ވަނަ ދުވަހު ހަދާފައިވާ ކަމަށް ދައުލަތުގެ މީޑިއާއިން ބުނެ އެވެ.
މިއީ މިއަހަރުގެ ތެރޭގައި ރަސްގެފާނު ސަލްމާން ފުއްޕާމޭގެ އާލާސްކަންފުޅަކަށް ފަރުވާ ހޯއްދަވާ ދެވަނަ ފަހަރެވެ. ކުރިން މިދިޔަ މެއި މަހު ވެސް މިފަދަ ފަރުވާއެއް ހޯއްދަވާފައިވެ އެވެ. ނަމަވެސް މިފަހަރުގެ އާލާސްކަންފުޅުގެ އިތުރު ތަފްސީލެއް ޝާހީ ގަނޑުވަރުން އަދި ހާމަކޮށްފައެއް ނުވެ އެވެ.
ރަސްގެފާނުގެ ސިއްހީ ހާލަތާ ގުޅިގެން މިދިޔަ އޯގަސްޓް މަހު ވަނީ ވަލީއަހުދު މުހައްމަދު ބިން ސަލްމާންއާ އެކު ކެބިނެޓްގެ ބައްދަލުވުންތައް ބޭއްވުމުގެ ހުއްދަވެސް ދެއްވާފަ އެވެ.
ދެ ހަރަމުގެ ވެރިޔާގެ ހައިސިއްޔަތުން، ރަސްގެފާނު ސަލްމާންގެ ސިއްހީ ހާލަތަކީ މުޅި މުސްލިމު އުންމަތަށް މުހިއްމު ކަމެކެވެ. މައްކާއާއި މަދީނާގެ ދެ ހަރަމަކީ މުސްލިމުންގެ އެންމެ މުގައްދަސް ތަންތަން ކަމުގައިވާތީ، އެތަންތަނުގެ ބެލެނިވެރިޔާގެ ދުޅަހެޔޮކަމަކީ އިސްލާމީ ދުނިޔޭގެ ސަމާލުކަން ލިބޭ ކަމެކެވެ. އަދި މުޅި ދުނިޔެ އިން ވެސް ސައުދީ އަރަބިއްޔާގެ ރަސްގެފާނު ސަލްމާންގެ ސިއްހީ ހާލަތު ގާތުން ބަލަމުންދެ އެވެ.
ތެލުގެ މުއްސަނދިކަން ލިބިފައިވާތީ ސައުދީ އަކީ ދުނިޔޭގައި ނުފޫޒު ގަދަ އިގްތިސާދީ ގޮތުން ބޮޑު ބާރެކެވެ.