އިންޓަނޭޝަނަލް އެޓޮމިކް އެނާޖީ އެޖެންސީ (އައިއޭއީއޭ) ގައި ރާއްޖެއިން ބައިވެރިވުމަށް ރައްޔިތުންގެ މަޖިލީހުގެ ރުހުން ހޯދުމަށް ހުށަހަޅުއްވައިފި އެވެ.
ރައްކާތެރިކަމާއި ސުލްހަވެރިކަމާއެކު ނިއުކްލިއާ ޓެކްނޮލޮޖީ ބޭނުންކުރުން ކުރިއެރުވުމުގެ މަގުސަދުގައި ގާއިމުކޮށްފައިވާ އައިއޭއީއޭގައި ރާއްޖެއިން ބައިވެރިވުމަށް ނިންމީ މިދިޔަ ސެޕްޓެމްބަރު މަހުގެ އެއްވަނަ ދުވަހު ބޭއްވި ވަޒީރުންގެ މަޖިލީހުގެ ޖަލްސާގަ އެވެ.
ރައީސް ޑރ. މުހައްމަދު މުއިއްޒު ރައްޔިތުންގެ މަޖިލީހަށް ފޮނުއްވި ސިޓީގައި ވިދާޅުވީ އައިއޭއީއޭގައި ރާއްޖެއިން ބައިވެރިވުމަށްޓަކައި ބައިވެރިވާންޖެހޭ މުއާހަދާއަކީ ގާނޫނުއަސާސީގެ 115 ވަނަ މާއްދާގެ ފ. އެއްވަނަ ނަންބަރުގައި ބަޔާންކޮށްފައިވާ ފަދައިން އެ މުއާހަދާގައި ރާއްޖެއިން ބައިވެރިވުމުގެ ސަބަބުން ދިވެހި ދައުލަތުން އެއްވެސް އިލްތިޒާމެއް އުފުލަންނުޖެހޭ ބާވަތުގެ އެއްބަސްވުމެއް ކަމަށެވެ.
ގާނޫނުއަސާސީގެ 93 ވަނަ މާއްދާގެ (ހ) ގައިވާ ގޮތުން ދިވެހި ދައުލަތުގެ ނަމުގައި ވެރިކަން ހިންގާ ފަރާތުން ބައިވެރިވާ ބައިނަލްއަގުވާމީ މުއާހަދާތަކަށް އަމަލުކުރަންވާނީ ރައްޔިތުންގެ މަޖިލީހަށް ހުށަހަޅައި އެ މަޖިލީހުން ފާސްކުރުމަށްފަހު އެވެ.
މަޖިލީހުގެ މިއަދުގެ ޖަލްސާގައި މި މައްސަލަ ދިރާސާކުރަން ވަނީ ހާރިޖީ ގުޅުންތަކުގެ ކޮމިޓީއަށް ފޮނުވާފަ އެވެ.