ދައުލަތުގެ ބެލުމުގެ ދަށުގައި، ކ. ގުރައިދޫ ހާއްސަ އެހީއަށް ބޭނުންވާ މީހުންގެ މަރުކަޒުގައި ތިބި ހަތަރު ކުދިން މިހާރުން މިހާރަށް ރައްކާތެރި މާހައުލަކަށް ބަދަލުކުރުމަށް ކުޑަކުދިންގެ ހައްގުތަކަށް މަސައްކަތް ކުރާ ޖަމިއްޔާ އާކް އިން ގޮވާލައިފި އެވެ.
އެފްސީއެސްސީ ގެތަކާއި ކުދިން އުޅޭ ހާލަތާމެދު ކަންބޮޑުވުން ފާޅުކޮށް އާކް އިން މިރޭ ނެރުނު ބަޔާނެއްގައި ބުނީ، ދައުލަތުގެ ބެލުމުގެ ދަށަށް ގެންނަ ކުދިން "ސޭފް ހޯމް" ތަކަށް ފޮނުވާއިރު، އެފަދަ ބައެއް ގެތަކަކީ ކުދިންނަށް ރައްކާތެރި ގެތަކެއް ނޫން ކަމަށެވެ. އެހެންކަމުން ދައުލަތުގެ ބެލެނިވެރިކަމުގެ ދަށަށް ބަދަލުވާ ކުދިންގެ ރައްކާތެރިކަމާ މެދު ސުވާލު އުފެދިފައިވާ ކަމަށާއި އެގޮތަށް ބަދަލުވެފައިތިބި ބައެއް ކުދިން މިހާރުވެސް ދައުލަތުން އެކުދިން ބައިތިއްބާ ތަންތަނުގައި ވަރަށް ހާލުގައި އުޅެމުންދާ ކަމަށެވެ.
ސޭފް ހޯމް އަކީ ދައުލަތުގެ ބެލުމުގެ ދަށަށް ގެންނަ ކުދިން ހުރުމަށް ވަކި ގޮތެއް ކަނޑައެޅެންދެން ނުވަތަ ކުޑަކުދިންގެ ހިޔާއިން އެކުދިންނަށް ޖާގައެއް ލިބެން ދެން ސަރުކާރުގެ ހަރަދުގައި ބައިތިއްބާ ހާއްސަ ގެތަކެކެވެ. އެފަދަ ބައެއް ގެތައް، ފެމިލީ އެންޑް ޗިލްޑްރަން ސާވިސް ސެންޓާ (އެފްސީއެސްސީ)ގެ ނަމުގައި އެކި އަތޮޅުތަކުގައި ވެސް ވަނީ ގާއިމްކޮށްފަ އެވެ. އެފްސީއެސްސީ ގެތައް ގާއިމްކޮށްފައިވަނީ ހދ. ކުޅުދުއްފުއްޓާއި ށ. ފުނަދޫގެ އިތުރުން ތ. ވޭމަންޑޫ އާއި ގދ. ތިނަދޫގަ އެވެ.
އާކް އިން ބުނީ، ކ. ގުރައިދޫގައި ހުންނަ ހާއްސަ އެހީއަށް ބޭނުންވާ މީހުންގެ މަރުކަޒުގައި މިހާރު ބައިތިއްބާފައި ތިބި ހަތަރު ކުޑަކުދިންގެ ހާލަތާއި މެދު އެ ޖަމިއްޔާއިން އިންތިހާ އަށް ކަންބޮޑުވާ ކަމަށެވެ. ގުރައިދޫ ހާއްސަ އެހީއަށް ބޭނުންވާ މީހުންގެ މަރުކަޒުގައި އެކުދިން ބައިތިއްބާފައިވަނީ ނަފްސާނީ ގޮތުން ސީރިއަސް މައްސަލަތަކެއް ހުރި ބޮޑެތި މީހުން ވެސް އުޅޭ ތަނެއްގައި، އެމީހުންގެ ތެރޭގައި ކަމަށް ވާތީ އެ ކުދިންގެ ރައްކާތެރިކަމާމެދު ސުވާލު އުފެދޭ ކަމަށެވެ.
ގުރައިދޫ ހާއްސަ އެހީއަށް ބޭނުންވާ މަރުކަޒުގައި އެކުދިން ބައިތިއްބާފައި ތިބީ ދާދިފަހުން އދ. އިން އެކުލަވާލި ޕީރިއަޑިކް ރިޕޯޓުގައި އެކުދިން އެތަނުން އެހެން ތަނަކަށް ބަދަލުކުރަން ގޮވާލާފައި ވަނިކޮށް ކަން ފާހަގަކޮށް އާކް އިން ވަނީ މިހާރުން މިހާރަށް ކުދިން އެހެން ތަނަކަށް ބަދަލުކުރަން ސަރުކާރަށް ގޮވާލާފަ އެވެ.
"އާކް އިން އަދިވެސް ހަނދާންކޮށްދެން އެންމެ ފަހުން އދ. އިން އެކުލަވާލި ޕީރިއަޑިކް ރިޕޯޓުގައި ވެސް އެކުދިން ކ. ގުރައިދޫ ހާއްސަ އެހީއަށް ބޭނުންވާ މީހުންގެ މަރުކަޒުން އެހެން ތަނަކަށް ބަދަލުކޮށްދޭން ބުނެފަ އޮތް އޮތުން. އެހެންކަމުން އަޅުގަނޑުމެން ހަރު އަޑުން ސަރުކާރަށް ގޮވާލަނީ މިހާރުން މިހާރަށް ކ. ގުރައިދޫ ހާއްސަ އެހީއަށް ބޭނުންވާ މީހުންގެ މަރުކަޒުގައި ތިބި ކުދިން އެ އަށްވުރެ ރައްކާތެރި ތަނަކަށް ބަދަލުކުރުމަށް. އަދި އެކުދިންނާ ދޭތެރޭ ބޭއިންސާފުން ހިނގާފައިވާ މައްސަލަތައް ވީހާވެސް އަވަހަށް ތަހުގީގުކޮށް، ދައުލަތުގެ ބެލުމުގެ ދަށުގައި ކުދިން ބައިތިއްބާއިރު ކުދިންނަށް ރައްކާތެރިކަން ނުދޭ ފަރާތްތަކާ މެދު ފިޔަވަޅު އަޅަން ވެސް ގޮވާލަން،" އާކް އިން ބުންޏެވެ.
އާކް އިން ވަނީ ކ. މާފުށީގައި ހުންނަ އެޑިއުކޭޝަން އެންޑް ޓްރެއިނިން ސެންޓަރު މިހާރު މަރާމާތަށް ބަންދުކޮށްފައިވާއިރު އެތަނުގައި ތިބި ކުދިންގެ ހިމާޔަތާއި ރައްކާތެރިކަން ކަށަވަރުވެފައިވާ މިންވަރާއި މެދު ވެސް ސުވާލު އުފައްދާފަ އެވެ. ކުދިން ދައުލަތުގެ ބެލުމުގެ ދަށަށް ގެންނަނީ ކުދިންނަށް ރައްކާތެރި މާހައުލެއް ނެތުމުންކަން ފާހަގަކޮށް އެ ޖަމިއްޔާ އިން ބުނީ ދައުލަތުގެ ބެލުމުގެ ދަށަށް ކުދިން އައުމަށްފަހު ވެސް އެ ނިކަމެތިކަމުގައި އަނެއްކާވެސް ދިރިއުޅެން ޖެހޭ ކަމަށެވެ.
ވަގުތީ ގޮތުން ކުދިން ބައިތިއްބާ ސޭފް ހޯމްތަކާއި އެފްސީއެސްސީ ގެތަކުގައި ކުޑަކުދިން ދިރިއުޅޭ ތަނެއްގައި ހުންނަންޖެހޭ ފެންވަރަށް ސަލާމަތީ ކަންކަން ފުރިހަމަވެފައި ނުހުރުމުގެ އިތުރަށް ކަބަޑުތަކާއި ފޮތްތައް ބަހައްޓާނެ ގޮތާއި އެފަދަ ޒަރޫރީ ބޭނުންތައް ފުއްދުމަށް ވެސް ފަސޭހަ ގޮތްތަކެއް ނުހުންނަކަން އާކްގެ ބަޔާނުގައި ފާހަގަކުރި އެވެ. ހާއްސަ ގޮތެއްގައި އަތޮޅުތަކުގެ ރަށްރަށުގައި ހުންނަ މިފަދަ ކުދިން ބައިތިއްބާ ތަންތަނުގެ ހާލަތު ގޯސް ވުމާއި އެފަދަ ދަށް ފެންވަރުގެ ތަންތަނުގައި ކުދިން ވަރަށް ގިނަ ދުވަހަށް ބައިތިއްބާ ކަން ވެސް އާކް އިން ވަނީ ފާހަގަކޮށްފަ އެވެ.
ވިލިނގިލީގައި ހުންނަ ކުޑަކުދިންގެ ހިޔާ: މިފަދަ ބައެއް ތަންތަނުގައި ކުދިންނަށް ބޭނުންވާ ޒަރޫރީ ބޭނުންތައް ފުއްދޭނެ ގޮތް ފަހިވެފައި ނެތްކަމަށް އާކް އިން ތުހުމަތު ކުރޭ --