އިޒްރޭލުން އީރާނަށް ވައިގެ ހަމަލާތައް ދިނުމަށްފަހު މިއަދު ފަތިހު އެ ގައުމުގެ ވައިގެ ސަރަޙައްދު ވަގުތީގޮތުން ބަންދުކޮށްފި އެވެ.
އިޒްރޭލުގެ ސިވިލް އޭވިއޭޝަން އޮތޯރިޓީން ނެރުނު އެންގުމެއްގައި ބުނެފައިވާ ގޮތުން، އެ ގައުމުގެ ވައިގެ ސަރަޙައްދު ބަންދުކޮށްފައި އޮންނާނީ މިއަދު ހެނދުނު 13:00 އާ ހަމައަށެވެ.
އިޒްރޭލުން އީރާނަށް ރޭ ހަމަލާ ދީފައިވަނީ މި މަހުގެ އެއްވަނަ ދުވަހު އީރާނުން އިޒްރޭލަށް އަމާޒުކޮށް ދިން ބެލިސްޓިކް މިސައިލް ހަމަލާތަކުގެ ރައްދުގައެވެ. އިޒްރޭލުން މި ހަމަލާތައް ދޭނެކަން ކުރިން އޮތީ އިންޒާރު ކޮށްފަ އެވެ.
އިތުރު ކަންބޮޑުވުމަކީ، އިޒްރޭލުން މި ދިން ހަމަލާތަކަށް ރައްދު ދޭނެ ކަމަށް އީރާނުންވެސް އިންޒާރު ދީފައިވުމެވެ. މިކަމާ ގުޅިގެން ސަރަޙައްދުގެ ގިނަ ގައުމުތަކުން ވަނީ ކަންބޮޑުވުންވެސް ފާޅުކޮށްފަ އެވެ.
މިކަމާ ގުޅިގެން ބައިނަލްއަގްވާމީ މުޖުތަމައުން ވަނީ ދެފަރާތަށްވެސް އިތުރު ހަމަލާތަކުން ދުރުހެލިވުމަށް ގޮވާލާފަ އެވެ.