އީރާންގެ ނިއުކްލިއާ މަރުކަޒުތަކަށް ހަމަލާދިނުމަށްޓަކައި ވާންޖެހޭ ހުރިހާ ތައްޔާރެއް އިޒުރޭލުން ވެފައިވާ ކަމަށް ރިޕޯޓްތައް ބުނެފި އެވެ.
އިޒުރޭލު ސަރުކާރުގެ ބައެއް ވެރިންނާ ހަވާލާދީފައި ހުރި ޚަބަރުތައް ބުނާ ގޮތުން، އީރާންގެ ނިއުކްލިއާ ގާބިލުކަން ނައްތާލުމަކީ ކޮންމެހެން ވެސް ކުރަން ޖެހޭ ކަމެއް ކަމަށް ވަޒީރުގެ މަޖިލީހުން ދެކެ އެވެ.
އީރާންގެ ނިއުކްލިއާ މަރުކަޒުތަކަށް ހަމަލާދޭން ބޭނުންވާ ހުރިހާ ވަސީލަތެއް އިޒުރޭލުން ތައްޔާރުކޮށްފައި ހުރި ކަމަށް ބުނާ ރިޕޯޓްތަކެއް ވެސް މަޝްހޫރު ނޫސްތަކުގައި ވަނީ ޝާއިއުކޮށްފަ އެވެ. އަދި އެވަރުގެ ހަމަލާތަކެއް ދިނުމުގެ ގާބިލުކަން އިޒުރޭލުގެ އަސްކަރިއްޔާގައި ހުރި ކަމަށްވެސް ޚަބަރުތައް ބުނެ އެވެ.
އިޒުރޭލުގެ ބޮޑުވަޒީރު ބެންޖަމިން ނަތަންޔާހޫ ސަރުކާރުގެ ވަޒީރުން ވިދާޅުވާ ގޮތުން، އީރާނުން ނިއުކްލިއާ ބޮމެއް އުފެއްދުމަށް ވުރެ ބޮޑު ބިރުވެރިކަމެއް އިޒުރޭލަށް ކުރިމަތި ނުވާނެ އެވެ. އެހެންކަމުން، އީރާނުން ނިއުކްލިއާ ގާބިލުކަން ހޯދަން ކުރާ ހުރިހާ ކަމެއް ފެންކޮށްލުމަށް އިޒުރޭލުގެ އަސްކަރިއްތާ އޮންނަން ވާނީ ތައްޔާރަށެވެ.
އިޒުރޭލު ގަބޫލުކުރާ ގޮތުން އީރާނާ ދެކޮޅަށް އިގުތިސާދީ ގޮތުން ދަތިކުރުމަކީ ނިއުކްލިއާ ދިރާސާ ހުއްޓުވެން އޮތް މަގެއް ނޫނެވެ. އީރާނުން ނިއުކްލިއާ ދިރާސާތަށް މިހާރު އޮތް ފެންވަރަށް ގެނައީ އިގުތިސާދީ ދަތިކުރުންތަކާ އެކު ކަމަށްވެސް އިޒުރޭލުން ބުންޏެވެ.
ރިޕޯޓްތައް ބުނާ ގޮތުން އޮކްޓޯބަރު ފަހުކޮޅު އިޒުރޭލުން އީރާނަށް ދިން ހަމަލާތަކުގައި، އެ ގައުމުގެ ނިއުކްލިއާ ދިރާސާކުރާ މަރުކަޒެއް ވަނީ ބޭނުންނުކުރެވޭ ވަރުކޮށްފަ އެވެ. މިކަމުގެ ސަަބަބުން އީރާންގެ ނިއުކްލިއާ ދުވެއްޔަށް ބުރޫއެރި ނަމަވެސް، ނިއުކްލިއާ ބޮމެއް އުފެއްދުމަށް އީރާރުން ކުރާ މަސައްކަތްތަކަށް ބުރޫ ނާޜާނެ ކަމަށް ތަޖުރިބާކާރުން ގަބޫލުކުރެ އެވެ.
އިޒުރޭލުން ހަމަލާދިން ނިއުކްލިއާ މަރުކަޒަކީ އީރާނުން މިހާރު ބޭނުންކުރާ މަރުކަޒެއް ނޫން ކަމަށްވެސް ޚަބަރުތައް ބުނެ އެވެ. އަދި އެކަހަލަ މަރުކަޒުތަކަށް ހަމަލާދިނެއް ކަމަކު، އީޜާން ނުހުއްޓުވޭނެ ކަމަށް ވެސް ޚަބަރުތައް ބުނެ އެވެ.
ނިއުކްލިއާ ދިރާސާކުރަން އީރާނުން އުފައްދާފައި ވަނީ އެންމެ މަރުކަޒެއް ނޫން ކަމަށްވެސް ޚަބަރުތައް ބުނެ އެވެ. އީރާނުން ނިއުކްލިއާ ދިރާސާތައް މިހާރު ކުރަނީ ފަރުބަދަތަކުގެ އަޑީގައި ވަރަށް ފުނުގައި ކަމަށްވެސް ޚަބަރުތައް ބުނެ އެވެ.