ތުރުކީ އިން ރާއްޖެއަށް ދީފައިވާ ސްކޮލާޝިޕްތަކަށް ފޯމް ހުށަހެޅުމުގެ ފުރުސަތު ޑިޕާޓްމަންޓް އޮފް ހަޔާ އެޑިއުކޭޝަނުން ހުޅުވާލައިފި އެވެ.
ހަޔާ އެޑިއުކޭޝަނުން މިއަދު ނެރުނު އިއުލާނެއްގައި ބުނީ، ތުރުކީ ސްކޮލަޝިޕްސްގެ ދަށުން އަންޑަ ގްރެޖުއޭޓް އަދި ޕޯސްޓްގްރެޖުއޭޓް ޕްރޮގްރާމްތަކުގައި ބައިވެރިވުމުގެ ފުރުސަތު މިހާރު ހުޅުވާލާފައިވާ ކަމަށެވެ. އޮންލައިންކޮށް އެޕްލިކޭޝަން ހުށަހެޅުމުގެ ފުރުސަތު ވެސް ހުޅުވާލާފައިވާ ކަމަށާއި އެ މައުލޫމާތު މިނިސްޓްރީގެ ވެބްސައިޓުން ލިބޭނެ ކަމަށެވެ.
ތުރުކީ ސްކޮލަޝިޕްގެ ދަށުން ގިނަ ޕްރޮގްރާމްތައް ކިޔަވައިދޭނީ ތުރުކީ ބަހުން ކަމަށް ވާތީ، ކޯހަށް ހޮވޭ ބައިވެރިން ތުރުކީ ބަސް ދަސްކުރުމަށް އެއް އަހަރު ދުވަހުގެ ޕްރޮގްރާމެއް ހަދަންޖެހޭނެ ކަމަށް އެޑިއުކޭޝަނުން ބުންޏެވެ.
ކޯހަށް އޮންލައިންކޮށް ފޯމް ހުށަހެޅުމުގެ ފުރުސަތު މިމަހުގެ ނިޔަލަށް ހުޅުވާލާފައި އޮންނާނެ އެވެ.
ރާއްޖޭގެ ކޮލެޖެއްގެ ދަރިވަރުންތަކެއް -- އަންޑަ ގްރެޖުއޭޓް އަދި ޕޯސްޓް ގްރެޖުއޭޓް ކިޔެވުމަށް ތުރުކީ ސްކޮލާޝިޕަށް ފޯމް ހުށަހަޅަން ވަނީ ފުރުސަތު ހުޅުވާލާފައި -- ފޮޓޯ: އަވަސް