ޕަބްލިކް ސާވިސް މީޑިއާ (ޕީއެސްއެމް)ގެ މުވައްޒަފެއްގެ ގޮތުގައި ހުންނަވައިގެން މޯލްޑިވްސް މީޑިއާ ކައުންސިލް (އެމްއެމްސީ)ގެ ރައީސްގެ މަގާމު ފުރުއްވަމުން ގެންދެވި އަހްމަދު މުސްތަފާ، ޕީއެސްއެމްގެ ވަޒީފާ އިން މިރޭ ކުއްލި ގޮތަކަށް ވަކިކޮށްފި އެވެ.
އެމްއެމްސީގެ ރައީސް އާއި ނައިބް ރައީސް އާއި މެންބަރުންނަކީ ޕާޓްޓައިމް ބަޔަކަށްވާތީ އެ މަގާމުތަކުގައި ތިއްބަވައިގެން އެހެން ތަނެއްގައި ވަޒީފާ އަދާކުރުމަށް އެއްވެސް ހުރަހެއް ނޯވެ އެވެ.
ޕީއެސްއެމްގެ ބައެއް މުވައްޒަފުން މިރޭ އަވަސްއަށް މައުލޫމާތު ދެމުން ބުނީ މުސްތަފާ މަގާމުން ވަކިކޮށްފައިވާ ކަމަށެވެ. މިކަމާ ގުޅިގެން ޕީއެސްއެމްގެ އިސްވެރިއެއްގެ ޖަވާބެއް އަދި ލިބިފައެއް ނުވެ އެވެ.
ޕީއެސްއެމްގެ މުވައްޒަފެއްގެ ގޮތުގައި މުސްތަފާ މަސައްކަތް ކުރައްވަމުން ގެންދަވާ 30 އަކަށް އަހަރުވެއްޖެ އެވެ. އޭނާ ވަޒީފާ އިން ވަކިކުރިއިރު ހުންނެވީ ޕީއެސްއެމްގެ ނިއުސް އޮފަރޭޝަންސްގެ މަގާމު ގައެވެ.
ޕީއެސްއެމް އިން މުސްތަފާއަށް ފިޔަވަޅު އަޅާފައި މިވަނީ އެމްއެމްސީ އިން ދެމުންގެންދާ ނޫސްވެރިންގެ އެވޯޑް ދިނުމުގެ ހަފްލާގައި ރޭ ދެއްކި ވީޑިއޯއެއްގެ މައްސަލަ ސަރުކާރަށް ތާއީދުކުރާ މީހުންގެ ތެރޭގައި ބޮޑުވެފައި ވަނިކޮށެވެ.
އެމްއެމްސީގެ މި ހަފްލާ ޕީއެސްއެމްގެ ޓީވީއެމް އިން ރޭ ވަގުތުން ދައްކާފައިވެ އެވެ. މި ހަފްލާގައި މައްސަލަ ހޫނުވީ ނޫސްވެރިންގެ އެވޯޑްގައި ހިމެނޭ ތަހުގީގީ ދާއިރާއިން ނޫސްވެރިކަމުގެ އިނާމު ލިބުނު "އަދަދު" އޮންލައިންގެ "ސްކީލާން" ޑޮކިއުމެންޓްރީގެ ކުރު ވީޑިއޯ ކޮޅެއް ދެއްކުމުންނެވެ.
ސްކީލާން ޑޮކިއުމެންޓްރީ އަކީ ރައީސް ޑރ. މުހައްމަދު މުއިއްޒުގެ ދޮންމަންމާފުޅު ސްކީލާން، ރައީސް މުއިއްޒަށް ބޮޑެތި ތުހުމަތެއް ކުރައްވާފައިވާ ޑޮކިއުމަންޓްރީ އެކެވެ. މި ޑޮކިއުމެންޓަރީ އަދަދު ނޫހުން އާންމުކުރީ މިދިޔަ ރިޔާސީ އިންތިހާބުގެ ކެމްޕޭންގެ އެންމެ ފަހު ދުވަސްކޮޅު އެވެ.
ޕީއެސްއެމްގެ ޗެނަލަކުން ރޭ ދެއްކި މި ވީޑިއޯ އަކީ އެ ކުންފުނީގެ އެޑިޓޯރިއަލް ކޮންޓެންޓާ ހިލާފަށް އަދި ނޫސްވެރިކަމުގެ އާންމު މިންގަނޑުތަކާވެސް ހިލާފު ވީޑިއޯއެއް ކަމަށް ޕީއެސްއެމް އިން މިރޭ ނެރުނު ބަޔާނެއްގައި ބުނެފައިވެ އެވެ. އެމްއެމްސީ އިން އެކަން ކުރީ ގަސްދުގައި ދުރާލާ ރާވައިގެން ކަމަށް ތުހުމަތުކޮށް އެމްއެމްސީގެ އެ އަމަލު ކުށްވެރިވެސް ކޮށްފައިވެ އެވެ. އަދި އެމްއެމްސީގެ މައްސަލަ ބަލައިދިނުމަށް ޕީއެސްއެމް އިން ވަނީ މަޖިލީހަށްވެސް ހުށަހަޅާފަ އެވެ.