އައްޑޫ ސިޓީގެ ހިތަދޫއާއި ހުޅުމީދޫ ގުޅާލުމަށް އެޅުމަށް ހަމަޖެހިފައިވާ ބުރިޖުގެ މަޝްރޫއު އަންނަ އަހަރު ފެށުމަށް ނިންމައިފި އެވެ.
ރައްޔިތުންގެ މަޖިލީހަށް ދައުލަތުގެ އަންނަ އަހަރުގެ ބަޖެޓް އިއްޔެ ހުށަހަޅުއްވައިދެއްވަމުން ފިނޭންސް މިނިސްޓަރު މޫސާ ޒަމީރު ވިދާޅުވީ އައްޑޫގެ ހިތަދޫއާއި ހުޅުމީދޫ ގުޅާލުމަށް އެޅުމަށް ހަމަޖެހިފައިވާ ބުރިޖުގެ މަސައްކަތް އަންނަ އަހަރު ފަށައިގަތުމަށް ނިންމާފައިވާ ކަމަށެވެ.
އައްޑޫ ބްރިޖު މަޝްރޫއުގެ ފީސިބިލިޓީ ސްޓަޑީ އާއި ޑިޒައިންގެ މަސައްކަތް މިއަހަރުގެ ފެބްރުއަރީ 19 ވަނަ ދުވަހު ސަރުކާރުން ހަވާލުކުރީ މިސްރު ސަރުކާރުގެ ކުންފުންޏެއް ކަމަށްވާ "ދަ އަރަބް ކޮންޓްރެކްޓާސް" އާ އެވެ.
ބްރިޖު މަޝްރޫއުގެ ސާވޭތައް ދަ އަރަބް ކޮންޓްރެކްޓާސް އިން ހަދައިދެނީ ހިލޭ އެވެ.
ހުޅުމީދޫ އާއި ހިތަދޫ ގުޅާލުމަށް ގާތްގަނޑަކަށް 13-15 ކިލޯމީޓަރުގެ ދިގު ބްރިޖެއް އަޅަން ޖެހެ އެވެ.
އައްޑޫސިޓީގެ ހުޅުމީދޫ އާއި ހިތަދޫ ގުޅާލުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދެކެވެ. އަދި ވެރިކަމުގެ ފުރަތަމަ އަހަރުގެ ތެރޭގައި މިމަސައްކަތް ފެށުމަށް އުއްމީދުކުރައްވާ ކަމަށްވެސް ރައީސް ކުރިން ވިދާޅުވެފައިވެ އެވެ.
"އުއްމީދަކީ އަދި އަޒުމަކީ އެންމެ ފުރަތަމަ ކޮޅު އަދި އެންމެ ފުރަތަމަ ހަފްތާގައިވެސް އިނީޝިއަލް ވޯކް ކުރުމުގެ މަސައްކަތް ފެށުން،" މުއިއްޒު ވިދާޅުވި އެވެ.
ދައުލަތުގެ އަންނަ އަހަރުގެ ބަޖެޓުގައި ތަރައްގީގެ މަޝްރޫއުތަކަށް ނުވަތަ ޕީއެސްއައިޕީ ބަޖެޓްގެ ގޮތުގައި ހިމަނާފައިވަނީ 12.4 ބިލިއަން ރުފިޔާ އެވެ.