އަންނަ އަހަރުގެ ދައުލަތުގެ ބަޖެޓުގައި މުވައްޒަފުންނަށް މުސާރަ ދިނުމަށް 14 ބިލިއަން ރުފިޔާ ހިމަނައިފި އެވެ.
ސަރުކާރުގެ ތަފާސްހިސާބުތަކަށް ބަލާއިރު ދައުލަތުން މިއަހަރު މުސާރަ ދެނީ ގާތްގަނޑަކަށް 44،000 މުވައްޒަފުންނަށެވެ. އަންނަ އަހަރު އެ އަދަދުގެ ތެރެެއަށް އިތުރު 6،000 މުވައްޒަފުން އިތުރުވާނެ ކަމަށް ލަފާކޮށްފައިވެ އެވެ.
ދައުލަތުގެ އަންނަ އަހަރުގެ ބަޖެޓުގެ ގޮތުގައި މަޖިލީހަށް ހުށަހަޅާފައިވަނީ 56.6 ބިލިއަން ރުފިޔާ އެވެ.
އަންނަ އަހަރުގެ ބަޖެޓުގައިވާ މައުލޫމާތުތަކަށް ބަލާއިރު މުވައްޒަފުންނަށް މުސާރަ ދިނުމަށް މުޅި ބަޖެޓުގެ 25 ޕަސަންޓާ ގާތްކުރާ އަދަދެއް ހޭދަކުރާނެ އެވެ. އެހެންކަމުން މިއީ މިއަަހަރު މުސާރައަށް ކުރާ ހޭދައަށް ވުރެ ގާތްގަނޑަކަށް 15 ޕަސަންޓް އިތުރު އަދަދެކެވެ.
މުވައްޒަފުންނަށް މުސާރަ ދިނުމަށް މިއަހަރު ދައުލަތުން ހޭދަކުރާނެ ކަމަށް ލަފާކޮށްފައިވަނީ 12 ބިލިއަން ރުފިޔާ އެވެ.
ދައުލަތުގެ އަންނަ އަހަރުގެ ބަޖެޓުގެ ގޮތުގައި 56.6 ބިލިއަން ރުފިޔާގެ ބަޖެޓް މިދިޔަ މަހުގެ 31 ވަނަ ދުވަހު މަޖިލީހަށް ހުށަހަޅާފައިވާއިރު އަންނަ އަހަރުގެ ބަޖެޓުގެ ތެރެއިން ހަރަދުގެ ގޮތުގައި ހިނގާނީ 49.2 ބިލިއަން ރުފިޔާ ކަމަށް ލަފާކޮށްފައިވެ އެވެ.
މީގެ ތެރެއިން 35.9 ބިލިއަން ރުފިޔާއަކީ ރިކަރަންޓް ހަރަދެވެ. 13.3 ބިލިއަން ރުފިޔާއަކީ ކެޕިޓަލް ހަރަދެވެ.