ލޯކަލް ކައުންސިލްތައް ބާރުވެރިކުރުވުމަށް މިސަރުކާރުން ހާއްސަ އިސްކަމެއް ދީގެން އަމަލީ މަސައްކަތްތަކެއް ކުރަމުންދާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
ރައީސް މުއިއްޒު މިހެން ވިދާޅުވީ ހުޅުމާލޭގައި ޒަމާނީ ފެންވަރަށް ގާއިމުކޮށްފައިވާ ޕެޓް ކެއާ ފެސިލިޓީ -- "އޮޅު ހިޔާ" ހުޅުވުމަށް މިއަދު ބޭއްވި ރަސްމިއްޔާތުގައި ވާހަކަދައްކަވަމުންނެވެ.
ރައީސް ވިދާޅުވީ މި ސަރުކާރުން ލާމަރުކަޒީ ނިޒާމުގެ ތެރެއިން މަސައްކަތްތައް ކުރުމަށް ހާއްސަ އިސްކަމެއްދޭ ކަމަށެވެ. އެގޮތުން ކައުންސިލްތަކާ ބައްދަލުކުރައްވައި އެކައުންސިލްތަކުން ބޭނުންވާ ކަންކަން ފަހިކޮށްދިނުމަށް މަސައްކަތް ކުރައްވާނެ ކަމުގައިވެސް ވިދާޅުވި އެވެ.
"ލާމަރުކަޒީ ނިޒާމުގެ ތެރެއިން ރައްޔިތުންނާ ގާތުން މަސައްކަތްކުރުމުގައި އެންމެ ބޮޑަށް އެންމެ އިސްކަމެއް ދީގެން އަޅުގަނޑުމެން މަސައްކަތްކުރަމުންދާކަން އެއީ ފެންނަން އޮތް ހަގީގަތް،" ރައީސް ވިދާޅުވި އެވެ.
ރައީސްގެ ވާހަކަފުޅުގައި ވަނީ މި ސަރުކާރުން ކައުންސިލްތައް ބާރުވެރިކުރުވުމަށް ކުރަމުންދާ މަސައްކަތްތައްވެސް ފާހަގަކުރައްވާފަ އެވެ. އެގޮތުން ކައުންސިލްތަކަށް އާމްދަނީ ހޯދޭނެ މަގުފަހިކޮށްދިނުމަށް މަސައްކަތްތަކެއް ކުރަމުންދާ ކަމަށް ވިދާޅުވި އެވެ.
ރައީސްގެ ވާހަކަފުޅު ނިންމަވާލައްވަމުން އެމަނިކުފާނު ވަނީ ރައްޔިތުންނާ ގުޅިގެން ރައްޔިތުން ބޭނުންވާ ކަންކަން ފަހިކޮށްދެއްވުމަށް މި ސަރުކާރުން ފުރިހަމައަށް މަސައްކަތްކުރައްވާނެ ކަމުގެ ޔަގީންކަންވެސް ކައުންސިލްތަކަށް ދެއްވާފަ އެވެ.
ކައުންސިލްތައް ބާރުވެރިކުރުވުމަށް މިސަރުކާރުން ހާއްސަ އިސްކަމެއް ދީގެން މަސައްކަތް ކުރަމުންދާ ކަމަށް ރައީސް ވިދާޅުވެފައި މިވަނީ ދައުލަތުގެ އަންނަ އަހަރުގެ ބަޖެޓު ހުށަހެޅިއިރު ބަޖެޓުން ކައުންސިލްތަކަށް ދޭންޖެހޭ ގްރާންޓް ފައިސާ މަދުކޮށް ބަޖެޓްގައި ހިމަނާފައިވާތީ ކައުންސިލްތަކުން ސަރުކާރަށް ވަރަށް ބޮޑަށް ފާޑުކިޔަމުން ދަނިކޮށެވެ.