ރާއްޖޭގެ ތައުލީމަށް ހިދުމަތްކުރުމުގެ އެންމެ މަތިވެރި ޝަރަފް، ނިޝާން އިއްޒުއްދީނުގެ އިއްޒަތުގެ ވެރިޔާ ޑރ. މުހައްމަދު ޒާހިރު ހުސައިނަށް އަރުވައިފި އެވެ.
ޒާހިރު ޝަރަފު އެރުވުން އޮތީ ޖުމްހޫރީ ދުވަހާ ގުޅުވައިގެން މިރޭ ދަރުބާރުގޭގައި ބޭއްވި ރަސްމީ ޖަލްސާ ގައެވެ.
ޑރ. ޒާހިރަށް ޝަރަފް އެރުވުމުގެ ގޮތުން ޝަރަފްގެ އައްޑަނައާއި ޝަރަފްގެ މެޑަލް ހަވާލުކޮށްދެއްވީ ރައީސް ޑރ. މުހައްމަދު މުއިއްޒު އެވެ.
ޑރ. ޒާހިރު ހުސައިނަށް މި ޝަރަފް އެރުވުމަށް ރައީސުލްޖުމްހޫރިއްޔާ ނިންމެވީ، ރާއްޖޭގެ ތައުލީމީ ތަރައްގީއަށާއި، ރާއްޖޭގައި ތައުލީމު ފުޅާކުރެއްވުމަށާއި، ތައުލީމީ ރޮނގުން ރާއްޖޭގެ ރައްޔިތުން ހޭލުންތެރިކުރެއްވުމަށް އިޚްލާސްތެރިކަމާއެކުގައި، ގިނަގުނަ ހިދުމަތްތަކެއް ކޮށްދެއްވާފައިވާތީ، އެކަމުގެ އަގު ވަޒަންކުރެއްވުމުގެ ގޮތުން ކަމަށް ރައީސް އޮފީހުން މައުލޫމާތު ދީފައިވެ އެވެ.
ރައީސް މައުމޫންގެ ވެރިކަމުގައި އެޑިޔުކޭޝަން މިނިސްޓަރު ކަމާއި އެހެން ބައެއް މިނިސްޓްރީގެ ވަޒީރުކަންވެސް ކުރައްވާފައިވާ ޒާހިރު މިވަގުތު ހުންނެވީ މޯލްޑިވްސް އިސްލާމިކް ޔުނިވަސިޓީ (އައިޔޫއެމް)ގެ ޗާންސެލަރުގެ މަގާމުގައެވެ.
ޑރ. ޒާހިރު ދިވެހި ދައުލަތަށް ހިދުމަތް ކުރައްވާތާ 40 އަހަރު ވެއްޖެ އެވެ. ހިދުމަތުގެ 32 އަހަރު ހޭދަކުރެއްވީ ތައުލީމީ ދާއިރާ ގައެވެ.