އައިޖީއެމްއެޗްގައި މަސައްކަތް ކުރި، ފިލިޕީންސްގެ ނަރުހެއް ކަމަށްވާ، މޭރީ ގްރޭސް އޮނެޑް ޕިނެޑާގެ މަރުގެ ތުހުމަތު ކުރެވޭ، ހަލީމަތު ލަމްހާ އަބްދުއްރަހްމާން ބަންދުން ދޫކޮށްލުމުން، އެ ނިންމުން ހައިކޯޓަށް ހުށަހަޅަން ދައުލަތުން ނިންމައިފި އެވެ.
މޭރީގެ މަރުގެ މައްސަލާގައި ޝަރީއަތް ނިމެންދެން ބަންދުކޮށްފައި ހުރި ލަމްހާ، ބަންދުން ދޫކޮށްލަން ކްރިމިނަލް ކޯޓުން ނިންމީ އަންގާރަ ދުވަހު އެވެ.
ގާޒީ ހުސައިން ފާއިޒު ރަޝާދު ވިދާޅުވީ ދައުލަތުގެ ގިނަ ހެކިންތަކެއްގެ ހެކިބަސް ނެގިފައިވާތީ އާއި ބާކީ ތިބި ހެކިންނަކީ ބަންދުން ދޫކޮށްލިޔަސް ހެއްކަށް ނުފޫޒު ފޯރުވުމުގެ ފުރުސަތު ކުޑަ ހެކިތަކަކަށް ވާތީ ލަމްހާ ދޫކޮށްލުމަށް ނިންމެވީ ކަމަށެވެ.
ޕްރޮސެކިއުޓާ ޖެނެރަލްގެ އޮފީހުން ބުނީ ލަމްހާ ދޫކޮށްލި މައްސަލަ ހައި ކޯޓުގައި އިސްތިއުނާފްކުރަން ނިންމާފައިވާ ކަމަށެވެ.
ލަމްހާ ދޫކޮށްލާފައި ވަނީ ހަ ޝަރުތަކާ އެކުގައެވެ. އެގޮތުން އޭނާ ރާއްޖެއިން ފުރައިގެން ނުދިއުމަށާއި، ގާނޫނާ ހިލާފު އަމަލެއް ނުކުރުމަށާއި، ކޯޓަށް ގަޑިއަށް ހާޒިރުވުމަށާއި، ޒަރޫރީ ބޭނުމެއްގައި ނޫނީ ގެއިން ބޭރަށް ނުދިއުމަށާއި، މައްސަލައިގެ ހެކިންނާއި މޭރީގެ އާއިލާއާ ބައްދަލު ނުކުރުމަށާއި، ވަކި ގަޑިތަކެއްގައި ގޭގައި ހުރުމަށް އަމުރުކޮށްފައި ވެއެވެ.
ކުރިންވެސް އެއް ފަހަރު ލަމްހާ ބަންދުން ދޫކޮށްލުމުން ދައުލަތުން ހައިކޯޓުގައި މައްސަލަ އިސްތިއުނާފުކޮށް އަލުން ލަމްހާ އޭރު ހައްޔަރު ކުރި އެވެ.