ޔުއެފާ ޗެމްޕިއަންސް ލީގުގައި ރޭ ކުޅުނު މެޗުތަކަށް ބަލާއިރު، އިންޓަ މިލާން އިން ލައިޕްޒިގު ބަލިކޮށް ލީގު ބުރުގައި ތާވަލުގެ އެއް ވަނަ އަށް އަރައިފި އެވެ. އަދި ބާސެލޯނާ އިން ބްރެސްޓް އަތުން މޮޅުވިއިރު، ބަޔާން މިއުނިކުން ވަނީ ޕީއެސްޖީ ބަލިކޮށްފަ އެވެ.
އިންޓަ މިލާން އިން ޖަރުމަނުގެ އާރްބީ ލައިޕްޒިގު ބަލިކުރީ 1-0 އިންނެވެ. މި މެޗުގައި ފެނިގެންދިޔަ ހަމައެކަނި ގޯލަކީ 27 ވަނަ މިނިޓްގައި ލައިޕްޒިގުގެ ކަސްޓެލޯ ލުކޭބޭ އަތުން ބައިކޮޅަށް ވަން ގޯލެކެވެ. މި ނަތީޖާއާއެކު، އިންޓަ އިން ލީގު ތާވަލު ކުރިއަށް ޖެހިލީ ފަސް މެޗުން 13 ޕޮއިންޓް ހޯދައިގެންނެވެ.
ބާސެލޯނާ އިން ފްރާންސްގެ ބްރެސްޓްގެ މައްޗަށް ކުރި ހޯދީ 3-0 އިންނެވެ. މި މެޗުގައި ބާސެލޯނާގެ ފޯވާޑް ރޮބަޓް ލެވަންޑޯސްކީ ވަނީ ދެ ގޯލު ޖަހާފަ އެވެ.
މި ލަނޑުތަކާ އެކު، ލެވަންޑޯސްކީ ވަނީ ޗެމްޕިއަންސް ލީގުގައި 100 ގޯލު ހަމަކޮށްފަ އެވެ. ބާސެލޯނާ އަށް އަނެއް ލަނޑު ޖަހައިދިނީ ޑަނީ އޮލްމޯ އެވެ. މި ނަތީޖާއާ އެކު، ބާސެލޯނާ އަށް ފަސް މެޗުން 12 ޕޮއިންޓް ލިބި، ދެވަނަ ވަނީ ލިބިފަ އެވެ. އަދި ބަޔާން މިއުނިކުން ވަނީ 1-0 އިން ޕީއެސްޖީ އަތުން މޮޅުވެފަ އެވެ. މި ނަތީޖާތަކާއެކު، ލީގު ތާވަލުގެ ތިންވަނައިގައި އޮތް ލިވަޕޫލަށް ވަނީ ހަތަރު މެޗުން 12 ޕޮއިންޓް ލިބިފަ އެވެ. ލިވަޕޫލުން މިރޭ އަމިއްލަ ދަނޑުގައި ރެއާލް މެޑްރިޑާ ކުޅޭ މެޗުން މޮޅުވެއްޖެނަމަ އަލުން އެއްވަނަ އަށް އެރޭނެ އެވެ.