ވަޒީރުންގެ މަޖިލީހަށް ބަދަލުތަކެއް ގެންނަން އުޅޭ ކަމަށް ދެކެވޭ ވާހަކަތައް ސަރުކާރުން ދޮގުކޮށްފި އެވެ.
ސަރުކާރުން މިހެން ބުނެފައި މިވަނީ ވަޒީރުންގެ މަޖިލީހަށް ބަދަލުތަކެއް ގެނައުމަށް ރައީސް ޑރ. މުހައްމަދު މުއިއްޒު ތައްޔާރުވެވަޑައިގަންނަވަމުންދާ ކަމަށް މިއަދު ސޯޝަލްމީޑިއާގައި ދެކެވުނު ވާހަަކަތަކަކާ ގުޅިގެންނެވެ.
ވަޒީރުންގެ މަޖިލީހަށް ބަދަލުތަކެއް ގެންނަން އުޅޭ ކަމަށް އަޑުތަކެއް އަރައިގެން ދިޔައީ ސިއްހީ ހާލުކޮޅު ހުރި ގޮތުން އެގްރިކަލްޗާ މިނިސްޓަރު ޑރ. އައިޝަތު ރަމީލާ މިއަދު މަގާމުން އިސްތިއުފާ ދެއްވުމާ ގުޅިގެންނެވެ.
ވަޒީރުންގެ މަޖިލީހާ ގުޅޭގޮތުން ދެކެވޭ ވާހަކަތަކާ ގުޅިގެން ރައީސް އޮފީހުގެ އިސް ތަރުޖަމާން ހީނާ ވަލީދު ވިދާޅުވީ "ކެބިނެޓަށް އެއްވެސް ބަދަލެއް ގެންނަވަން ރައީސުލްޖުމްހޫރިއްޔާ ނިންމަވާފައި ނުވާ" ކަމަށެވެ.
ރައީސް ޑރ. މުހައްމަދު މުއިއްޒުގެ ސަރުކާރުގައި 22 ވަޒީރުން ތިއްބަވަ އެވެ. ޑރ. ރަމީލާގެ އިތުރުން ފިނޭންސް މިނިސްޓަރުގެ މަގާމުގައި ހުންނެވި ޑރ. މުހައްމަދު ޝަފީގު ވަނީ ސަރުކާރަށް އެއް އަހަރުވުމުގެ ކުރިން މިދިޔަ އޮކްޓޫބަރު މަހު މަގާމުން އިސްތިއުފާ ދެއްވާފަ އެވެ.