އީރާނުން ނިއުކްލިއާ ހަތިޔާރު އުފައްދަން ދެން މާގިނަ ދުވަހެއް ނުނަގާނެ ކަމަށް ފަރަންސޭސި ފޮރިން އިންޓެލިޖެންސްއާ ބެހޭ ވެރިޔާ، ނިކޮލަސް ލާނާ ވިދާޅުވެއްޖެ އެވެ.
އީރާންގެ ނިއުކްލިއާ ޕްރޮގްރާމް މިހާރު އޮތީ ވަރަށް ނުރައްކާތެރި ފައްތަރެއްގައި ކަމަށް ލާނާ ވިދާޅުވި އެވެ. ފަރަންސޭސިވިލާތަށް އޮތް އެންމެ ބޮޑު ނުރައްކަލީ އެއީ ކަމަށްވެސް އޭނާ ވިދާޅުވި އެވެ.
ލާނާ އަދި ވިދާޅުވީ މި ހާލަތު މެދުވެރިވީ ހުޅަނގުން އީރާނާ ތޮޅެން ހަދައިގެން ކަމަށެވެ. ބާރުގަދަ ކަމަށް ބުނާ ގައުމުތަކުން ބަލަން ތިއްބައި އީރާނުން ދެން އުފައްދާނީ ނިއުކްލިއާ ބޮމެއް ކަމަށް އޭނާ ވިދާޅުވި އެވެ.
އެމެރިކާއާ އާއި ޔޫރަޕްގެ ގައުމުތަކުން އީރާނާ މެދު ދެކޭ ގޮތް ބަދަލުކޮށް ލުއި ނުދީފި ނަމަ، ނިއުކްލިއާ މާއްދާތައް މުއްސަދިކުރުން މެކުހަށް ޖަހާނެ ކަމަށް އީރާން އޮތީ ބުނެފަ އެވެ.
އީރާނުން ނިއުކްލިއާ ބޮމެއް އުފައްދަން މަސައްކަތްކުރާ ކަމަށް ބުނެ އެޅި ދަތިކުރުމުގެ ފިޔަވަޅުތައް އެ ގޮތުގައި ދެމިގެން ގޮސްފައި އޮތް އިރުވެސް، އިރާނުން ނިއުކްލިއާ ބޮމެއް އުފައްދާފައި ނުވާ ކަމަށް އެ ގައުމުން ބުންޏެވެ.
އީރާންއާ މެދު ނުބައި ތަސައްވުރެއް ގެންގުޅޭ ނަމަ އީރާނަށް އިތުރު އިޚުތިޔާރެއް ނޯންނާނެ ކަމަށް އެ ގައުމުން ބުންޏެވެ. ދެން އޮތް ހަމައެކަނި އިޚުތިޔާރަކީ ނިއުކްލިއާ މާއްދާތައް މުއްސަނދިކުރުން ކަމަށް އީރާންގެ ނިއުކްލިއާ ހަކަތައާ ބެހޭ އޮފިޝަލުން ބުންޏެވެ.
އެމެރިކާއިން އަޅާފައި ހުރި ދަތިކުރުންތަކަށް ލުއިދީފި ނަމަ، ނިއުކްލިއާ ހަރަކާތްތައް ހުއްޓާލާނެ ކަމަށް އީރާން އޮތީ ބުނެފަ އެެވެ. ނަމަވެސް، އީރާނަށް އެއްވެސް ލުޔެއް ދިނުމަކީ އެމެރިކާ ބޭނުންވާ ގޮތެއް ނޫނެވެ.
އިރާން ބުނި ގޮތުން އިގުތިސާދީ ފިއްތުންތައް ދަމަހައްޓައިފި ނަމަ ނިއުކްލިއާ މަސައްކަތްތައް ފުޅާކުރާނެ އެވެ. އެ ނޫން ގޮތެއްގައި އޮތީ އީރާނަށް ލުއިދިނުން ކަމަށް އެ ގައުމުން ބުންޏެވެ.