މެކްސިކޯ އާއި ކެނެޑާ އެމެރިކާގެ ދެ ސްޓޭޓަށް ހެދުމަކީ އެދެވިގެންވާ ކަމެއް ކަމަށް އެމެރިކާގެ އިންތިހާބީ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.
ޓްރަމް ވިދާޅުވީ އެމެރިކާއިން ސަބްސިޑީޒް ދޭ ދެ ގައުމުގެ ގޮތުގައި ދެމިއޮތުމަށް ވުރެ -- މެކްސިކޯ އާއި ކެނެޑާ އެމެރިކާގެ ސްޓޭޓަކަށްވުން އައުލާކަން ބޮޑު ކަމަށް ފެނިވަޑައިގަންނަވާ ކަމަށެވެ.
އެ ނޫން ގޮތެއްގައި ތާއަބަދަށް ސަބްސިޑީޒް ދިނުމަކީ ފަހަރެއްގައި އެމެރިކާއަށް ކުރަން ނުފެންނަ ކަމަކަށް ވެދާނެ ކަމަށްވެސް އިންތިހާބީ ރައީސް ވިދާޅުވި އެވެ.
އޭނާ ވިދާޅުވީ ކެނެޑާ އާއި މެކްސިކޯއިން ގަވާއިދާ ހިލާފަށް މީހުން އެމެރިކާއަށް އެތެރެވާ މައްސަލަ ވަރަށް ބޮޑު ކަމަށެވެ. ރަސްމީ ސިފައެއްގައި މި މައްސަލަ ހައްލުކުރުމަށް މި ދެ ގައުމުން ހަރުކަށި ފިޔަވަޅުތަކެއް ނާޅާނަމަ އެމެރިކާއަށް އެތެރެކުރާ މުދަލުން 25 ޕަސެންޓްގެ ޓެކުހެއް ނަންގަވާނެ ކަމަށްވެސް ޓްރަމްޕް ވިދާޅުވި އެވެ.
މި ދެ ގައުމުން އެެމެރިކާއަށް ވަގަށް އެތެރެވާ މީހުން އެންމެ ގިނައިން ކުރާ ކަމަކީ ޑްރަގް ވިޔަފާރި ކަމަށް ޓްރަމްޕް ވިދާޅުވި އެވެ. ހަރުދަނާ ދާއިރާތަކުން މަަސައްކަތްތެރިން އެމެރިކާއަށް ލިބުމުގެ ބަދަލުގައި -- ޑްރަގާ ހެދި ޖީލުތައް ހަލާކުވަނީ ކަމަށްވެސް ވިދާޅުވި އެވެ.
ޓްރަމްޕް ވިދާޅުވި ގޮތުގައި ސަބްސިޑީޒް ގޮތުގައި ވޮޝިންގްޓަނުން މެކްސިކޯއަށް އަހަރަކު 300 ބިލިއަން ޑޮލަރުގެ އިނާޔަތް ދެވޭ ކަމަށެވެ. އަދި ކެނެޑާއަށް އަހަރަކު 100 ބިލިއަން ޑޮލަރުގެ އެހީ ދެވޭ ކަމަށެވެ.
އެމެރިކާއަށް މިހާ ބޮޑު ހޭދައެއް މި ދެ ގައުމަށް ކުރަން ޖެހޭ ސަބަބެއް ނެތް ކަމަށް ޓްރަމްޕް ވިދާޅުވި އެވެ. މިގޮތުގައި ދެމިތިބުމަށް ވުރެ ކެނެޑާ އާއި މެކްސިކޯ އެމެރިކާއަށް -- ވޮޝިންގްޓަނަށް ނިސްބަތްވުން ރަނގަޅު ކަމަށް ވިދާޅުވި އެވެ.
އެމެރިކާއިން ބޮޑު ޓެކްހެއް ނަގައި، ނުއުފުލޭ ވަރުގެ ބުރައެއް ކެނެޑާ އަށާއި މެކްސިކޯއަށް ޖައްސައިފިނަމަ މި ދެ ގައުމުގެ އިގުތިސާދަށް ލޮޅުންއަރާނެ ކަމަށް މި ދެ ގައުމުން ވަނީ ބުނެފަ އެވެ.
މި ޝަކުވާއަށް އޮތް ހައްލު ކަމަށް ޓްރަމްޕް ވިދާޅުވީ އެމެރިކާގެ ދެ ސްޓޭޓަށްވުން ކަމަށެވެ. ގައުމުގެ ވެރިންނާއި ސިޔާސީ ލީޑަރުން މިކަމާ މެދު ރަނގަޅަށް ވިސްނައި ގޮތެއް ނިންމުމަށް ޓްރަމްޕް އެދިވަޑައިގެންނެވި އެވެ.