ޣައްޒާއިން ސިފައިން ބާލަށް އިޒުރޭލުން އެއްބަސްވެއްޖެ އެވެ.
އިޒުރޭލުގެ އަސްކަރިއްޔާއިން މިގޮތަށް ފާސްކުރީ ގައިދީން ބަދަލުކުރުމަށް ހަމާސް ޖަމާއަތާ އެކު ކުރެވުނު މަޝްވަރާތަކަށްފަހު ކަމަށް މީޑިއާ ރިޕޯޓްތައް ބުނެ އެވެ.
އިޒުރޭލުގެ ހާރެޒް ނޫހުން އަސްކަރިއްޔާއާ ހަވާލާދީ ބުނި ގޮތުން މަޝްވަރާތަކަށް ލިބުނު ކުރިއެރުންތަކާ ގުޅިގެން ޣައްޒާއިން ސިފައިން ބޭލުމުގެ މަސައްކަތް އަވަސްކުރާނެ އެވެ. އަދި މިކަމަށް ގިނަ ރޭވުންތަކެއް ރާވާފައި އޮތް ކަމަށްވެސް ބުނެވެ އެވެ.
ޣައްޒާއިން ސިފައިން ބާލަން އިޒުރޭލުން ރާވާފައި ވަނީ ފިޔަވަަހިތަކަކަށް ބަހާލައިގެންނެވެ. މިގޮތުން ސިފައިން ނުބާލާނެ ކަމަށް ކުރިން ބުނި ބައެއް ސަރަހައްދުތަކުންވެސް، ސިފައިން ބާލާނެ ކަމަށް ހަބަރުތައް ބުނެ އެވެ.
އިޒުރޭލުން މީގެ ކުރިން ރާވާފައި އޮތީ ޣައްޒާ އިން ނުފައިބާ ގޮތަށެވެ. އަދި ގިނަ ދުވަހު ދެމިތިބުމަށް އަސްކަރީއްޔާއަށް ބޭނުންވާ ގިނަ ވަސީލަތްތަކެއްވެސް ވަނީ ޣައްޒާގެ އެކި ހިސާބުތަކުގައި ރާވާފާ އެވެ.
އަސީރުން މިނިވަންކުރަން އެކަށީގެންވާ ރަނގަޅު ޑީލެއް އޮތް ނަމަ، ޣައްޒާއިން ސިފައިން ބޭލުމުގައިވެސް މިފަދަ ފަސޭހަ ގޮތްތަކަކަށް އަމަލުކުރާނެ ކަމަށް ޔަހޫދީން ބުންޏެވެ.
ރިޕޯޓްތައް ބުނާ ގޮތުން އަސީރުން މިނިވަންކޮށް ޣައްޒާއިން ސިފައިން ބޭލުމަށް ގަތަރުގައި މިހާރު ކުރިއަށްދާ މަޝްވަރާތަކުން ކުރިއެރުންތަކެއް ވަނީ ލިބިފަ އެވެ.
އިޒުރޭލުގެ ބޮޑުވަޒީރު ބެންޖަމިން ނަތަންޔާގެ އޮފީހުންވެސް ވަނީ މި މައުލޫއަށް ވާހަކަދައްކައި، އަސީރުން މިނިވަންކުރުމާ އެކު ޣައްޒާއިން ސިފައިން ބާލަށް ތައްޔާރު ކަމަށް ބުނެފަ އެވެ.