އަޒަރުބައިޖާން އެއާލައިންސްގެ މަތިންދާބޯޓު ވެއްޓުނީ ރަޝިޔާގެ ވައިގެ ދިފާއީ ނިޒާމުން ފޮނުވި މިސައިލަކުން ޖެހި ކަމަށް އޮފިޝަލުން ބުނެފި އެވެ.
މި ބޯޓު ވެއްޓުނީ ކަޒަކިސްތާންގެ ސިޓީއެއް ކަމަށްވާ އަކްތައު އަށް، ބުދަ ދުވަހު އެވެ.
އަޒަރުބައިޖާން އެއާގެ މަތިންދާބޯޓު ވެއްޓުނީ އެ ގައުމުގެ ވެރިރަށް ބަކޫއިން ފުރައިގެން ޗެޗްނިއާގެ ގްރޮޒްނީއަށް ދަތުރުކުރަނިކޮށެވެ. މި ހާދިސާގައި ބޯޓުން ދަތުރުކުރި 67 މީހުންގެ ތެރެއިން 38 މީހަކު ވަނީ މަރުވެފަ އެވެ.
ރިޕޯޓްތައް ބުނާ ގޮތުން މި ބޯޓު ވެއްޓެން މެދުވެރިވި މައިގަނޑު ސަބަބަކީ ރަޝިއާގެ ދިފާއީ ނިޒާމްގެ އިލެކްޓްރޯނިކްސްގެ ބާރުގަދަކަމުންނެވެ.
މިސައިލުން ދިފާއުވުމަށް ރަޝިއާ ސަރަހައްދުގައި ބޭނުންކުރާ ބާރުގަދަ ރޭޑިއޯ ވޭވްސްތަކުގެ ސަަބަބުން އަޒަރުބައިޖާންގެ މަތިންދާބޯޓުގެ މުވާސަލާތީ ނިޒާމު މުޅިން ފޭލިވެ އަދި ރާޑަރުން ގެއްލުނީ ކަމަށް ޚަބަރުތައް ބުނެ އެވެ.
މި ބޯޓު ވެއްޓުނު ސަބަބެއް ކަމަށް ކުރިން ބެލެވިފައި އޮތީ އެ ހިސާބުގައި އުދުހޭ ބޮޑެތި ދޫނިތަކުގެ ސަބަބުންނެވެ.
ނަމަވެސް، މަތިންދާބޯޓު ވެއްޓިފައި އޮތް ސަރަހައްދު ހޯދައި ބޭލުމުގެ ތެރޭގައި، މަތިންދާބޯޓުގެ ހުންގާނުގައި ހުރި ބޮޑު ބާގަނޑެއް ފެނި، އެއީ ރަޝިއާގެ މިސައިލް ނިޒާމުން ފޮނުވި މިސައިލެއް އެރުމުގެ ސަބަބުން ހިނގި ހާދިސާއެއްކަން ގާތްގަނޑަކަށް މިހާރު ވަނީ ކަށަވަރުވެވަ އެވެ.
ރަޝިއާގެ ރިޔާސީ ގަނޑުވަރު ކްރެމްލިންގެ ތަރުޖަމާން ދިމިތުރީ ޕެސްކޯފް ވިދާޅުވި ގޮތުން، ތަހުގީގު ނުނިމެނީސް ވަކި ގޮތެއް ނިންމުން ވާނީ އިލްޒާމަކަށެވެ. އެއީ ރަޝިއާގެ ދިފާއީ ނިޒާމުން ފޮނުވި މިސައިލަކުން ހިނގި ހާދިސާއެއް ކަމަށް ބުނަން އަދި އަވަސް ކަމަށް ތަރުޖާން ވިދާޅުވި އެވެ.