އިންޑިއާގައި ވަރަށް ބޮޑު މަގޫބުލު ކަމެއް ހޯއްދެވި އެ ގައުމުގެ ކުރީގެ ބޮޑުވަޒީރު މަންމޯހަން ސިންގް އަވަހާރަވެއްޖެ އެވެ.
އުމުރުފުޅުން 92 އަހަރުގައި މަންމޯހަން ސިންގް އަވަހަރާވިއިރު، އަނބިކަނބަލުންނާއި ތިން އަންހެން ދަރިކަނބަލުން ދުނިޔޭގައި އެބަތިއްބެވި އެވެ.
މަންމޯހަން ސިންގް އިންޑިއާގެ ބޮޑުވަޒީރުކަން ކުރެއްވީ 2004 އިން 2014 އަށެވެ.
ސިންގް އަވަހާރަވީ މިރޭ ދިމާވި ކުއްލި އާލާސްކަންފުޅަކާ ގުޅިގެން އެއިމްސް ހޮސްޕިޓަލަށް ގެންގޮސް ފަރުވާ ދެމުން ދަނިކޮށެެވެ.
ސިންގް އަވަހާރަވުމާ ގުޅިގެން އިންޑިއާގެ ސިޔާސީ މައިދާނުގައި ފާހަގަކުރެވޭ ސިޔާސީ ލީޑަރުން މިހާރު ގެންދަވަނީ ހޮސްޕިޓަލަށް ޒިޔާރަތް ކުރައްވައި އާއިލާއަށް ތައުޒިޔާ ކިޔަމުންނެވެ.
އިންޑިއާގެ ވަރަށް ގިނަ ބަޔަކު ދެކޭ ގޮތުގައި އިންޑިއާއަށް މިހާރު ލިބެމުންދާ އިގްތިސާދީ ކުރިއެރުންތަކުގެ ބިންގާ އަޅުއްވާ ބޮޑެތި ހެޔޮ ބަދަލުތަކެއް ގެނެސްދެއްވީ މަންމޯހަން ސިންގްގެ ބޮޑުވަޒީރު ކަމުގައެވެ.
ސިންގް އަކީ އިނގިރޭސިވިލާތުގެ ކޭމްބްރިޖް ޔުނިވަސިޓީ އިން 1952 ވަނަ އަހަރު އިކޮނޮމިކްސް ދާއިރާއިން ގުރެޖުއޭޓްވެފައިވާ ބޭފުޅެކެވެ.
ސިންގް ސިޔާސީ ހަޔާތް ފެއްޓެވީ 1971 ވަނަ އަހަރު އިންޑިއާގެ މިނިސްޓްރީ އޮފް ކޮމާސްގެ އިކޮނޮމިކް އެޑްވައިޒަރުގެ މަގާމުންނެވެ.
މަންމޯހަން ސިންގް ވަނީ ބޮޑުވަޒީރު ކަމުގައި ރާއްޖެއަށްވެސް ރަސްމީ ޒިޔާރަތެއް ކުރައްވާފަ އެވެ.