އިންޑިއާގެ މަނީޕޫރު ސްޓޭޓްގައި ހިނގަމުންދާ އަލިފާނުގެ ހާދިސާތަކާއި ހަމަނުޖެހުންތަކާ ގުޅިގެން ބައެއް ސަރަހައްދުތަކުގައި ކާފިއު އިއުލާންކޮށް، އިންޓަނެޓާއި މޯބައިލް ފޯނުގެ ހިދުމަތްތައް ވަގުތީގޮތުން މެދުކަނޑާލައިފި އެވެ.
މި ފިޔަވަޅުތައް އެޅީ އެތައް ސަތޭކަ ބަޔަކު އެއްވެ، އެ ސްޓޭޓުގެ ގާނޫނު ހަދާ މަޖިލީހުގެ މެންބަރުންގެ ގެތަކަށް ހަމަލާދިނުމާ ގުޅިގެންނެވެ.
ފުލުހުން ބުނާގޮތުން މުޒާހަރާގެ ބައިވެރިން ވަނީ ގާނޫނު ހަދާ މަޖިލީހުގެ ނުވަ މެންބަރެއްގެ ގެއަށް ހަމަލާދީ އޭގެ ތެރެއިން ހަތަރު ގެއަކަށް ވަދެ މުދަލަށް ގެއްލުން ދީފަ އެވެ.
މުޒާހަރާކުރި ފަރާތްތަކުން ވަނީ އެއްގަމު އުޅަނދުފަހަރުގައި ހުޅުޖަހައި، ގެތަކުގައި ހުރި އަގުބޮޑެތި މުދަލަށްވެސް ގެއްލުން ދީފަ އެވެ.
މި ހަމަނުޖެހުންތައް ފެށުނީ މެއިޓީ ދަރިކޮޅުގެ ތިން މީހެއްގެ ހަށިގަނޑު ކޯރެއްގެ ތެރެއިން ފެނުމާ ގުޅިގެން ކަމަށް އިނޑިއާގެ ހަބަރު ފަތުރާ ވަސީލަތްތަކުން ރިޕޯޓުކޮށްފައިވެ އެވެ.
މި ތިން މީހުންނަކީ އެއް އާއިލާއަކަށް ނިސްބަތްވާ ހަ މީހުންގެ ތެރެއިން ބައެކެވެ. މެއިޓީ ދަރިކޮޅުގެ މީހުން ބުނާ ގޮތުގައި މި އަމަލު ހިންގީ ކުއްކީ ދަރިކޮޅުގެ މީހުންނެވެ.
މިދިޔަ އަހަރުގެ މޭ މަހުން ފެށިގެން މަނީޕޫރުގައި ހިނގަމުންދާ ހަމަނުޖެހުންތަކުގައި މިހާތަނަށް 250 އަށް ވުރެ ގިނަ މީހުން މަރުވެ، 60،000 އަށް ވުރެ ގިނަ މީހުން ވަނީ ގެދޮރު ގެއްލިފަ އެވެ. މަނިޕޫރުގައި 2.3 މިލިއަން މީހުންގެ އާބާދީއެއް އޮތް އިރު ހަމަނުޖެހުންތައް ކޮންޓްރޯލް ކުރުމަށް ސަރުކާރުން ވަނީ އިތުރު ސިފައިން ފޮނުވާފަ އެވެ.
މެއިޓީއާއި ކުއްކީ ދަރިކޮޅުގެ މެދުގައި މި ހަމަނުޖެހުންތައް ފެށުނީ ކުއްކީ ދަރިކޮޅަށް ލިބިދީފައިވާ ހާއްސަ އިނާޔަތްތަކާއި ފުރުސަތުތައް މެއިޓީ ދަރިކޮޅުގެ މީހުންނަށްވެސް ފަހިކޮށްދިނުމަށް ކޯޓަކުން އަމުރުކުރުމާ ގުޅިގެންނެވެ.