ޔަމަނުގެ ވެރިރަށް ސަނާގައި އޮންނަ، ސަނާ އެއާޕޯޓަށް އިޒުރޭލުގެ އަސްކަރީ ޖެޓުތަކުން ހަމަލާދިންއިރު ހުންނެވީ އެއާޕޯޓްގައި، ހަމަ އެ އިމާރާތުގައި ކަމަށް ދުނިޔޭގެ ސިއްހަތު ޖަމިއްޔާ (ޑަބްލިޔުއެޗްއޯ) ގެ ސެކްރެޓަރީ ޖެނެރަލް، ޓެޑްރޮސް އަދަނޮމް ގެބްރެޔޭސުސް ވިދާޅުވެއްޖެ އެވެ.
އިޒުރޭލުގެ ހަމަލާގައި ޑަބްލިޔުއެޗްއޯ ފަޅުވެރިއަކަށް ހާނީއްކަވި ކަމަށް ސެކްރެޓަރީ ޖެނެރަލް ވިދާޅުވި އެވެ.
ޓެޑްރޮސް ވިދާޅުވި ގޮތުގައި ސަނާ އެއާޕޯޓުން ފުރަން ތައްޔާރުވެފައި އޮއްވައި، އެއްވެސް ވަރަކަށް އިންޒާރުދިނުމެއް ނެތި އަދި ތަން ހުސްކުރަން އަންގާ އޮންނަ އެންގުުމަށް ވެސް އަމަލުކުރުމެއް ނެތި އިޒުރޭލުން ދިން ހަމަލާތަކުގައި، އޭނާ އައީ އެ ޖަމާއަތުގެ ޓީމު ކިޔިޔާ ސަލާމަތްވީ އެވެ.
އެއާ ޓްރެފިކް ކޮންޓްރޯލަށް ލިބުނު ގެއްލުންތަކުގެ އިތުރުން ވީއައިޕީ ޑިޕާޗާ ލޯންޖަށް ވެސް ބޮޑެތި ގެއްލުންތައް ލިބުނު ކަމަށް ސެކްރެޓަރީ ޖެނެރަލް ވިދާޅުވި އެވެ. އަދި ރަންވޭއަށް ލިބުނު ގެއްލުންތައް މަރާމާތުކުރެވެންދެން މަޑުކުރަން ޖެހިވަޑައިގަތް ކަމަށް ވެސް އޭނާ ވިދާޅުވި އެވެ.
ޓެޑްރޮސް އަދި ވިދާޅުވީ އޭނާ އާއި އޭނާގެ ޓީމަށް މާބޮޑު ގެއްލުންތަކެއް ނުލިބި އަދި މަރުން ސަލާމަތްވި ނަަމަވެސް، އިޒުރޭލުގެ ހަަމަލާގައި މަރުވި މީހުންގެ އާއިލާތަކަށް ހަމްދަރުދީވެ ވަޑައިގަންނަވާ ކަމަށެވެ. އެ ހިތާމާގައި އަމަލާއި ބަހުން ބައިވެރިވެ ވަޑައިގަންނަވާނެ ކަމަށް ވެސް އޭނާ ވިދާޅުވި އެވެ.
ޑަބްލިޔުއެޗްއޯގެ ސެކްރެޓަރީ ޖެނެރަލް ވިދާޅުވި ގޮތުގައި އޭނާ އާއި އޮފިޝަލުން ޔަމަނަށް ވަޑައިގަތީ ޔަމަނުގައި ހައްޔަރުކޮށްފައި ތިބި އެ ޖަމާއަތުގެ މެމްބަރުން ދޫކޮށްލާތޯ މަޝްވަރާކުރެއްވުމަށް ކަމަށެވެ.
އަދި ޔަމަނުގެ ސިއްހީ ހާލަތު އަންދާޒާކުރައްވައި ކުރިއަށް އޮތް އަހަރަށް ތައްޔާރުވުމަކީ ވެސް ދަތުރުގެ ބޭނުމެއް ކަމަށް އޭނާ ވިދާޅުވި އެވެ.
އިޒުރޭލުން ޔަމަނުގެ ސަނާ އެއާޕޯޓް ހިމެނޭ ގޮތުން އެތައް މިތަނަށް ދިން ހަމަލާތަކަކީ، ހޫސީން އިޒުރޭލުގެ ވެރިރަށް ތެލްއަވީވަށް ދިން ހައިޕާ ސޮނިކިން މިސައިލް ހަމާއަށް ބަދަލުހިފުމަށް ދިން ރައްދެކެވެ.
އިޒުރޭލުގެ ބޮޑުވަޒީރު ބެންޖަމިން ނަތަންޔާހޫ ވިދާޅުވި ގޮތުގައި ހޫސީންގެ މަރުކަޒުތަކަށް ބާރުގަދަ ހަމަލާތަކެއް ދިނުމަށް އަސްކަރިއްޔާއަށް އޮންނާނީ އަންގަވާފަ އެވެ.