ރާއްޖޭގެ ހުރިހާ އަތޮޅު ހޮސްޕިޓަލްތަކުން ސައިކޭޓްރީ އަދި ސްޕީޗް ތެރަޕީގެ ހިދުމަތް ލިބޭނެ އިންތިޒާމު ހަމަޖެއްސުމުގެ މަސައްކަތް ފަށާފައިވާ ކަމަށް ހެލްތު މިނިސްޓަރު އަބްދުﷲ ނާޒިމް އިބްރާހީމް ވިދާޅުވެއްޖެ އެވެ.
ދައުލަތުގެ މީޑިއާ -- ޕީއެސްއެމްއަށް ދެއްވި އިންޓަވިއުއެއްގައި ނާޒިމް ވިދާޅުވީ ނަފުސާނީ ގޮތުން އެކި އުނދަގޫތައް ކުރިމަތިވާ މީހުން ރާއްޖޭގައި ގިނަ ކަމަށެވެ.
ސައިކޭޓްރީ އަދި ސްޕީޗް ތެރަޕީގެ ހިދުމަތް ލިބެނީ މާލެ އާއި ބައެއް ރީޖަނަލް ހޮސްޕިޓަލްތަކުންކަން ފާހަގަކުރައްވާ މިނިސްޓަރު ނާޒިމް ވިދާޅުވީ ރަށްރަށުން އެ ހިދުމަތްތައް ނުލިބޭތީ ފަރުވާއަށް މީހުން މާލެ އަންނަން ޖެހޭ ކަމަށެވެ.
އެ ހިދުމަތްތައް ހުރިހާ އަތޮޅު ހޮސްޕިޓަލްތަކުން ލިބޭނެ އިންތިޒާމު ހަމަޖެއްުސުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދެއް ކަމަށާއި އެ ހިދުމަތްތައް އަތޮޅުތަކުން ލިބޭނެ އިންތިޒާމު ހަމަޖެއްސުމުގެ މަސައްކަތް ފަށާފައިވާ ކަމަށްވެސް މިނިސްޓަރު ނާޒިމް ވިދާޅުވި އެވެ.
އެ ގޮތުން ސައިކޮލޮޖިސްޓުންނާއި ސައިކޭޓްރިސްޓުންގެ އިތުރުން ކައުސެލަރުންނާއި ތެރެޕިސްޓުން ހޯދުމުގެ މަސައްކަތް ކުރިއަށްދާ ކަމަށް ވިދާޅުވި އެވެ.