އައިލެންޑް އޭވިއޭޝަން ސާވިސަސް (އައިއޭއެސް) އިން އޮޕަރޭޓް ކުރާ މޯލްޑިވިއަންގެ އާ އޭ-330 ވައިޑް ބޮޑީ މަތިންދާބޯޓުގެ ދަތުރުތައް ފެށުމާއެކު އަހަރަކު 60،000 އިތުރު ޓޫރިސްޓުން ރާއްޖެއަށް ގެނެވޭނެ ކަމަށް އެ ކުންފުނިން ބުނެފި އެވެ.
މޯލްޑިވިއަންގެ ޑެޕިއުޓީ މެނޭޖިން ޑިރެކްޓަރ އަލީ ސަލީމް ވިދާޅުވީ 264 މީހުންގެ ޖާގައިގެ މި ބޯޓުގެ ދަތުރުތައް އެންމެ ފުރަތަމަ ފަށާނީ ޗައިނާގެ ތިން ސިޓީ އަކަށެވެ. އެއީ ބެއިޖިން، ޝަންހާއި އަދި ޗެންދޫ އެވެ.
މި ތިން ސިޓީއަށް ހަފްތާއަކު އެއް ދަތުރު ކުރުމަށް ހަމަޖެހިފައިވެ އެވެ.
އައިއޭއެސްގެ ޓެކްނިކަލް ސްޓްރެޓެޖީ މެނޭޖަރު އިސްމާއިލް އާތިފް މުހައްމަދު ވިދާޅުވި ގޮތުގައި މި ބޯޓުގައި 18 ބިޒްނަސް ކްލާސް ސީޓާއި، 36 ޕްރިމިއަމް އިކޮނޮމީ ސީޓާއި 210 އިކޮނޮމީ ސީޓު ހުންނާނެ އެވެ. އަދި 10 ޓަނުގެ ކާގޯ އުފުލުމުގެ ގާބިލުކަން ލިބިގެންވާ މި ބޯޓަކީ މެދުނުކެނޑި 10 ގަޑިއިރު އުދުހުމުގެ ގާބިލްކަން ލިބިގެންވާ ބޯޓެކެވެ.
ވައިްޑް ބޮޑީ މަތިންދާބޯޓުގެ ދަތުރުތައް ފެށުމުން ޗައިނާއިން މުދާ އެތެރެކުރުމާއި ޗައިނާއަށް މުދާ ފޮނުވުމަށް ފަސޭހަތަކެއް ލިބިގެންދާނެ ކަމަށްވެސް އާތިފް ވިދާޅުވި އެވެ. މި ބޯޓުގެ ސަބަބުން ޔޫރަޕާއި އެފްރިކާ އަދި އޮސްޓްރޭލިއާއަށް ދަތުރުކުރުމުގެ މަގުވެސް ފަހިވެގެންދާނެ އެވެ.
މިހާރު ސިންގަޕޫރުގައި އޮތް މި ބޯޓުގެ މަރާމާތުތައް ނިމި، ޖެނުއަރީ ހަވަނަ ދުވަހު ރާއްޖެ ގެނެވޭނެ ކަމަށްވެސް އާތިފްފް ވިދާޅުވި އެވެ.
މިވަގުތު މޯލްޑިވިއަންގެ ފްލީޓުގައި ޖުމްލަ 13 މަތިންދާބޯޓު އެބަހުއްޓެވެ. އޭގެ ތެރޭގައި އެއާބަސް އޭ320 އެއް ބޯޓާއި، އޭޓީއާރްގެ ހަތަރު ބޯޓާއި އަދި ޑޭޝް މަރުކާގެ ބޯޓުތައް ހިމެނެ އެވެ. ބޭރު ދަތުރުތަކުގައި މިހާރު ބޭނުންކުރަނީ އެއާބަސް އޭ320 ބޯޓު އެކަންޏެވެ.