ގައުމީ އެއާލައިން -- މޯލްޑިވިއަންގެ ދަތުރުތަކުގައި ވައިޑް-ބޮޑީ މަތިންދާބޯޓު އަންނަ މަހުގެ 17 ވަނަ ދުވަހު ބޭނުންކުރަން ފަށާނެ ކަމަށް ޓްރާންސްޕޯޓް މިނިސްޓަރު މުހައްމަދު އަމީން ވިދާޅުވެއްޖެ އެވެ.
ދައުލަތުގެ މީޑިއާގައި ވާހަކަ ދައްކަވަމުން މިނިސްޓަރު އަމީން ވިދާޅުވީ އޭ330 މަރުކާގެ އެ މަތިންދާބޯޓުގެ ލިވަރީ ބަދަލުކުރުމަށް މިހާރު ސިންގަޕޫރަށް ގެންގޮސްފައިވާ ކަމަށެވެ. ލިވަރީއަކީ ފްލައިޓްގެ ބޭރުގައި ހުންނަ ކުރެހުމާއި ކުލަ އެވެ.
މިނިސްޓަރު އަމީން ވިދާޅުވީ މިހާރު ޝެޑިއުލް އޮތް ގޮތުން އެ މަސައްކަތް މިމަހުގެ 31 އަށް ނިމޭނެ ކަމަށާއި ފްލައިޓް ޖެނުއަރީ ހަތްވަނަ ދުވަހު ރާއްޖެ އަންނާނެ ކަމަށެވެ.
"މޯލްޑިވިއަންގެ ޝެޑިއުލް ފްލައިޓްތައް ދުރު ރާސްތާއަށް ފެށިގެންދާނެ ޖެނުއަރީ 17 ވަނަ ދުވަހު،" އަމީން ވިދާޅުވި އެވެ.
މޯލްޑިވިއަން އިން ވަނީ އިޓަލީ އާއި އިނގިރޭސިވިލާތާއި ޖަރުމަނުގެ އިތުރުން ދެކުނު އެފްރިކާއަށް ދަތުރުތައް ފަށަން ނިންމާ ޖެނެރަލް ޕަސެންޖާ ސޭލްސް އެޖެންޓުންގެ ހިދުމަތް ހޯދަން އިއުލާނުކޮށްފަ އެވެ.
މި ދަތުރުތަކުގައި ބޭނުންކުރާ ފްލައިޓްގައި ޖުމްލަ 264 ސީޓު ހުރެ އެވެ. އެއީ ބިޒްނަސް ކްލާހުގެ 18 ސީޓާއި ޕްރިމިއަމް އިކޮނޮމީގެ 36 ސީޓުގެ އިތުރުން އިކޮނޮމީ ކްލާހުގެ 210 ސީޓް އެވެ.
މޯލްޑިވިއަންގެ ފްލީޓްގައި މި ވަގުތު އޭ320 މަރުކާގެ ފްލައިޓެއް އޮތްއިރު މިއީ ނެރޯ-ބޮޑީ ފްލައިޓެކެވެ.