ރާއްޖޭގައި ރިސޯޓު ހިންގާ ޑަބްލިއު ކުންފުންޏަށް ހާއްސަ އަންނައުނު ބްރޭންޑެއް އޮސްޓްރޭލިޔާގެ ކުންފުންޏަކުން ނެރެފި އެވެ.
ޓޫރިޒަމް ހަބަރު ގެނެސްދޭ ވެބްސައިޓްތަކުގައިވާ ގޮތުން އޮސްޓްރޭލިޔާގެ "ވެއާ ހޭންޑްސަމް" ބްރޭންޑާއި ޑަބްލިއު މޯލްޑިވްސް ކުންފުނި ގުޅިގެން ތައާރަފު ކުރި މޫދު ކުޅިވަރުގެ ހަރަކާތްތަކުގައި ބޭނުންކުރާ އަންނައުނުގެ މި ބްރޭންޑުގެ ތެރޭގައި ދެ ޖިންސުގެ މީހުންނަށް ހާއްސަ ހެދުން ހިމެނެ އެވެ.
"ހޭންޑްސަމް" ބްރޭންޑު ފަރުމާކޮށްފައިވަނީ މޫދު ކުޅިވަރުތަކުގައި ބޭނުންކުރާ ސުވިމް ވެއާ އާއި އެ ނޫން ވެސް ހެދުންތައް ފަރުމާކުރުމަށް މަޝްހޫރު ކެޓްރީކާ އާއި ޖެރެމީ ސޯމޭސްގެ ދެމަފިރިންނެވެ. މޫދަށް ގޮސް އުޅޭއިރު ލާން ހާއްސަ މި ހެދުންތަކުގައި ހިމަނާފައިވާ ކުލަތައްވެސް ވަނީ މޫދުގެ ދިރުންތަކާއި އެހެން ވެސް ތަކެއްޗާ ގުޅުވާލާފަ އެވެ. އެގޮތުން މި ހެދުމުގައި ޖެލީފިޝްގެ ކުލަތައް ހިމަނާފައިވެ އެވެ. މީގެ އަގުތައް އުޅެނީ 200-256 ޑޮލަރާއި ދެމެދުގަ އެވެ. މި ބްރޭންޑުގެ ސާމާނު "ވީއާހޭންޑްސަމް ޑޮޓްކޮމް" ވެބްސައިޓުން ލިބެން ހުރެ އެވެ.
ޑަބްލިއު ކުންފުނިން ރާއްޖޭގެ އިތުރުން އިންޑޮނޭޝިޔާގެ ބާލީގައި ވެސް ރިސޯޓު ހިންގަމުންދެ އެވެ. އަދި މީގެ އިތުރު ރިސޯޓެއް ވަރަށް އަވަަހަށް އިންޑިޔާގެ ގޯވާގައި ވެސް ހުޅުވާނެ އެވެ.
ވެއާ ހޭންޑްސަމް ބްރޭންޑުން ނެރުނު ހެދުން.--ފޮޓޯ:ބޫރޯ ޓޫފޯސެވަން